利嘉兒高齡產婦連環犯禁
藝人利嘉兒（Lily）曾經歷兩次小產之痛，早前宣布成功懷孕，雖是高齡產婦但未有避忌，現懷有5個多月身孕的她，日前撇甩老公的嚴密監控，獨自行街濕平，更連環犯下大肚婆禁忌，除着上斗零踭鞋外，又不時踎低起身試用BB車，及後更肆無忌憚飲汽水及買西瓜，身為潮媽的她無懼傳統禁忌。
當年憑無綫節目《笑談普通話》而人氣急升的Lily，2010年嫁予經營製衣及門鎖的有米老公Bong，兩人一直渴望有小朋友，終在今年4月宣布懷孕！今年44歲屬高齡產婦的Lily，未有因佗B而變得小心翼翼，曾揚言會照美甲及染髮，相反老公Bong則變成緊張大師，化身私人保鏢全天候睇實Lily。
踩斗零踭步履輕盈
面對老公嚴密監控，Lily日前終撇甩老公「放監」，獨自行街濕平輕鬆一番，卻連環「犯禁」！懷孕5個多月的她，當時一頭啡金短髮兼身穿T恤牛仔褲，肚皮雖明顯大了不少，但身形未有走樣，手腳依然纖瘦，穿上斗零踭鞋的她步履輕盈。準媽媽Lily主攻嬰兒用品，期間行足四、五間舖亦未見疲態，最後她鎖定目標走入一間專賣BB車的店舖。甫進店，Lily即不停詢問店員BB車的功能，期間未有理會自己粗身大勢，多次踎低起身試「開車」、「收車」。在店舖企足個半小時後，她終覺得疲倦，坐在店內梳化休息，期間Lily又犯禁，突然在手袋內拿出孕婦不宜過度飲用的冰凍汽水暢飲。
休息過後，Lily繼續濕平，經過玩具店時停低睇玩具及圖書，但未有收穫。最終Lily轉戰超級市場，除買營養高的食物及牛奶外，經過水果攤位，Lily竟然在西瓜位置徘徊，更落力揀西瓜，企圖挑戰不宜吃生冷食物的傳統禁忌，令人睇到牙煙！濕平了一整天，Lily老公Bong為免嬌妻操勞，即出動過百萬名車兼化身「柴可夫司機」接送，然後雙雙回家！
「老公叫少啲出街」
對於連環犯禁，Lily接受本報記者訪問時，輕鬆地指鞋踭不算太高：「一吋半吋OK，老公冇鬧。（見你飲汽水噃！）佗B要十個月，飲支汽水都唔敢，太大壓力，輕鬆啲對BB都好啲，間中飲一支冇所謂，問過醫生其實冇問題。」講到買西瓜，Lily解釋是買給老公：「西瓜當然唔係我食，我老公要陪我十個月，同我食一樣嘅嘢，佢咪好慘囉，所以我有時都會揀番啲啱佢食嘅嘢畀佢。（老公好緊張？）緊張，個肚愈嚟愈大，天氣又咁熱，佢都叫我少啲出街。我會去有佢陪我嘅地方，或者佢送我，然後喺附近等我！」
|
鍾意就快D Share啦！
|
|
|
