亞視繼上月傳因大老闆鄧俊杰閂水喉，繼原職CEO吳雨及營運總監區偉林轉做顧問後，閂水喉行動昨再傳出第二波，近30名員工前日突然被炒。亞視對外事務部總監曾醒明昨承認此事，解釋是公司要重整架構所致。至於讀者投訴是吳雨花光兩年儲備，連累員工被炒，吳雨昨呼冤否認，希望不要道聽途說。
不死亞視2016年起熄機逾20個月，隨着去年12月獲法庭撤銷清盤呈請而宣佈復活，去年12月中舉行「亞洲電視數碼媒體有限公司重組啟航暨應用程式啟用儀式」，逾30名藝人撐場，會上除宣佈無綫前總經理陳志雲主持全新《百萬富翁》外，更透露會翻拍亞視經典劇《我和殭屍有個約會》。及至1月尾舉行《亞洲電視數碼媒體啟播典禮》慶開台，請來林子祥、任賢齊和韓星南太鉉擔任表演嘉賓，場面墟冚。
| | |
《A1娛頭》重災區
亞視大股東協盛協豐今年4月易名為亞洲電視控股有限公司，大老闆鄧俊杰在去年啟用儀式上，曾宣佈首年泵水4億投資亞視，不過，近日卻屢次傳出亞視閂水喉，繼上月原職亞視CEO吳雨及營運總監區偉林齊齊轉為顧問後，亞視又因閂水喉在前日炒了近30名員工。
昨日有聲稱是「憤怒的一群」的讀者向本報爆料，指亞視前日不合理解僱近百員工。讀者指吳雨當日向員工許下的承諾未能兌現，更指吳雨提前花光老闆開台計劃中夠用兩年的資金，令老闆鄧俊杰不滿，結果因為吳雨過錯而連累員工被炒陪葬，又指下星期亞視會再炒200員工，只保留20、30人播舊片，令到員工人心惶惶。
據本報了解，亞視前日確為縮皮而解僱了30名員工，包括導演、攝影師等工程部和製作部員工，部份被解僱員工為《A1娛頭》幕後，原因是節目經常翻炒幾日前新聞，而非新鮮熱辣城中熱話，因而引起管理層極度不滿。
對於讀者報料指亞視大裁員，亞視對外事務部總監曾醒明昨說：「亞視目前只有250至270員工，如果話上星期炒咗100人，下禮拜又再炒200人，咪成個亞視冇人做嘢變負數？我了解咗，噚日6月1日大概有三十幾人受影響，三十幾個人當中有幾個係自動辭職，主要原因係公司要重整架構。亞視由開台到𠵱家幾個月，製作部想節目上有一個重新檢討，節目策略上將有新節目取代現有節目。因為節目方針有所調校嘅話，我哋會因應人手增加或者減少，所以一部份同事目前或者唔需要用住，係中止咗合作，但唔排除當我哋需要作更多節目時，再搵番佢哋返嚟合作。」
否認下周大裁員
曾醒明又指所有被解僱員工都依足勞工法例賠償，對於下周再大裁員，曾醒明否認說：「我冇聽過，因為嚟緊新節目都開始積極籌備，唔排除會吸納番一啲同事返嚟。」
至於被指是「使大咗」連累員工被炒，前CEO吳雨昨呼冤否認說：「冇啲咁嘅事，個讀者話我使大咗，叫佢問番管理層，唔好道聽途說，我請人時出糧出足咁多個月。班管理層重喺度，叫佢直接問番佢哋，個讀者咁講好唔負責任，呢個係管理層嘅決定，亞視有咁嘅動作，我唔了解，但冇理由賴我吖嘛。」
採訪：魯吉
|
鍾意就快D Share啦！
|
|
|
