最近《刑事偵緝檔案》系列重播，唔少網民有熱烈談論，而監製潘嘉德仲吹雞搞飯局，今晚喺將軍澳擺4圍，唔少演員都有出席。潘嘉德最早到場 拎埋當年宣傳用，簽晒名嘅摺扇，佢話：「今次係試金石，得我一個冇辦法通知晒咁多人，或者到25周年搞大啲，到時會抽獎同遊戲。」
講到呢套經典劇，佢話：「原來用咗好多人拍，有啲係客串，不過就算幾場戲俾足力，出嚟效果似層層，觀眾有興趣睇，呢個唔係我嘅功勞，係台前幕後成班同事嘅努力。」
係咪離開TVB？潘嘉德話：「o依家係自由身，年底會同無綫拍電視電影，中間會去吓旅行。」之後佢話：「我嘅合約10月尾，係提前走，本身嘅合約可以提早，今次係和平分手。」 但係講到有傳無綫將會裁員，佢話：「我唔知，從來都唔理邊個走，邊個升，只係睇自己嘢。」唔知會唔會擔心俾人話係被炒？佢話：「唔緊要，早幾十年炒我，嗰陣 簽約簽咗10年，之後轉咗形式，每2年簽一次，簽咗好耐，所以唔可以咁講，如果唔係好冇良心，我哋只係換合作方式，有興趣咪合作。」
郭藹明同艾威都有嚟到，郭藹明一嚟到就同潘嘉德合照，講到最近《刑偵》重播，郭藹明就話冇睇，因為太夜播，自己好早瞓。郭藹明話同一班工作人員好耐冇見，今次見返佢哋，啲回憶都返晒：「當時同大家合作都好開心，但係同大家都好少聯絡。」
問到郭藹明有冇技癢想再拍返劇、同埋有冇啲角色好想演，佢就話：「少啲，都離開咗呢個圈一段時間，個心就冇咁癢。」至於如果有人搵啲話，會唔會考慮，佢就話：「都少啲機會，係都等青雲去做。」
近年嘅香港小姐選完之後，都好少人會留低喺大台工作，郭藹明就話：「就算係依家嘅香港小姐嘅形式都唔一樣，時代唔同咗，好多嘢都唔同咗，好多人依家都係為咗攞個經驗。」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|