古天樂、杜琪峯、盧海鵬、Sammi等代表鮮浪潮，接受「劉鑾雄慈善基金」捐贈支票儀式。
不過喺記者會尾聲，各人影大合照時，就發生咗一單插曲……喺台後上層近扶手電梯位置，就有一位女子手持banner爬出欄杆，該banner寫上「求恩」、「古天樂」等字眼，又有一個大陸地址、電話同信件。
據了解，該女子想向古仔借100萬醫病重爸爸，當時現場眾嘉賓同演員背向該女子，事發時唔知有事發生，約1分多鐘後，幾位保安爬出欄杆制服咗呢位女子，但信都有交到去古仔手上。
古仔受訪時唔知有突發事件，當記者解釋情況後，佢坦言：「嘩，都幾危險。其實我哋公司時不時都收到類似個案，有時會擔心，但又驚係騙案，會了解清楚先，如果係真嘅會處理。」佢話有私下處理過類似案件，但佢強調一定會了解清楚先：「有時要幫人唔會講定一個銀碼，但就一定盡力幫。」古仔認同該女子行為過激：「我以為有人想跳落嚟，危害到其他人安全，如果要人幫有其他方式。」
問到古仔有冇遇過騙案？佢話：「我哋一定了解咗先，老人院、社區、學校，有時都未必係金錢幫助，可能係物資或者探訪，有時有啲個案唔係完全為錢。」記者讚佢形象好，成日做善事，所以今次先有人「求恩」？佢就好謙虛話：「冇深究過，幫到就量幫。總之有同事幫啲個案。」
Sammi表示佢哋都係入到後台先至知出事，至於佢本人是否亦曾有類似經驗？Sammi話冇。咁有冇fans向佢提出需要經濟援助？佢就話有時都會收到啲私訊，想佢幫忙：「我會覺得好為難，因為唔知事件真係，但又好擔心佢哋。今次唔知古仔點處理件事喇，等佢了解咗先啦，不過古仔為人好願意幫助別人，等佢了解咗件事先啦。」
精選娛聞，喺晒《娛果》
http://fb.com/appledailyent
來源 source: http://hk.entertainment.appledaily.com
|
鍾意就快D Share啦！
|
|
|