森美前日於九龍塘又一城出席「Samsonite#EVOA一喼伴旅」期間限定店揭幕禮，更即席為兒子製作皮革行李牌兼大談旅遊心得。森美接受專訪時透露，太太是他的旅遊良伴，皆因她有冒險精神，不時為他製造即興的歡樂。
富冒險精神
愛與太太孖住去旅行的森美，指對方是最貼心的伴侶︰「有時出埠要做嘢或者帶團，我都會帶老婆去，當係助手，因為一個人去做嘢夜晚喺酒店好孤單，有老婆喺身邊陪我睇電視講吓嘢好好多。」
森美更列出旅遊良伴的三大條件，他說︰「首先要識揸車，因為自由行有時租車去遠啲嘅地方，一揸要揸三、四個鐘頭，多個人同你分擔吓爭好遠。其次要識睇地圖，否則個個旨意你壓力好大。第三要有冒險精神，我自問唔係但老婆係，佢會好即興咁同我講，不如我哋去邊度睇花，就係要有呢一種冒險精神，所以先會享受到嗰種即興嘅歡樂。」
| | | |
叉電最重要
近年大仔赴英升學，森美和太太去旅行次數更密︰「𠵱家仔女都大啦，有時間就同佢去多啲旅行，試過一年去咗五次，然後佢又同朋友去。冇我喺度，佢買嘢買得開心好多。」
森美因為主持節目《森美旅行團》，成為旅遊達人。他說每次去旅行前，都會做足準備功夫，所以不需要旅遊書跟身，反而上網找資料更實際︰「所以旅行第一要帶係叉電，冇電就乜嘢都做唔到，其次係相機，而最重要就梗係錢啦。」
另外，新一輯《森美旅行團》將於下月播出，上輯森美在雙彩虹背景下說「掛住老婆」，令觀眾很感動，但他卻自爆被老婆鬧：「上次返到嚟畀老婆鬧我，話畀人錯覺以為我好錫佢喎！其實我喺個心錫佢㗎。」口甜舌滑的森美，冧爆老婆啦。
採訪：曹家誠
攝影：陳俊強
|
鍾意就快D Share啦！
|
|
|