梁洛施（Isabella）為小小超李澤楷誕三子後，一直專心湊仔，上次涉足演藝圈工作，已經是14年和詹瑞文合作演舞台劇。Isabella昨日正式復工，聯同周汶錡、蔣怡等人出席護膚品牌活動。叉足電的Isabella容光煥發，講工作及三個兒子皆有問必答，還自稱魔鬼媽咪，表示囝囝都撐她復工。惟涉及舊愛小小超及感情問題即封口。
上月23日剛度過30歲生日的梁洛施，自10年誕下孖仔H&N後，一直專心照顧兒子，只於13年復出拍過張艾嘉電影《念念》，以及14年和詹瑞文合作演舞台劇《快樂勿語》。上月Angelababy經理人Kim在社交網貼她的相片，表示二人將有合作，暗示Isabella將會復出。
昨晚Isabella終於復工，聯同周汶錡、蔣怡、黃芷晴、姜麗文等人，出席護膚品牌Clé de Peau Beauté「鑽光水凝氣墊粉底」發佈會。穿上全白色衫褲的Isabella，拍照後即接受傳媒訪問，她說：「𠵱家係全面復出，自己都係獨立女性，所以都要做嘢，我係Woman power同Girls power！」問囝囝會否黐身？Isabella笑謂：「唔會，都大喇，8、9歲有自己朋友，佢哋都有帶朋友返屋企睇戲，我就播《Mummy3》（盜墓迷城3）畀佢哋睇。」
| | |
斟緊拍電影
提到三個寶貝兒子，Isabella滔滔不絕，又說兒子都鼓勵她工作。她透露：「𠵱家有幾部電影傾緊，嚟緊會公佈，另外有綜藝節目。」她又表示：「都會接多啲戲，可能拍吓類似超人片！」問她想做甚麼角色？Isabella即笑稱：「Cool啲嘅，佢哋喺屋企都叫我做魔鬼角色。」
問Isabella會否拍親子綜藝節目？她表示不會，因為不想牽涉小朋友。是否不希望兒子曝光？她坦言：「唔會曝光，不過自己鍾意玩，想有新嘗試，好玩就得！不過你哋都影過」至於是否跟Richard（李澤楷）有協議，不讓兒子曝光？Isabella即封嘴謂：「私人嘢唔答喇！」
囝囝作伴侶
去年Isabella被影到和中年四眼男拍拖食飯兼咀嘴，昨日問她感情狀況，她依然封口不談：「呢啲唔答喇！」問她會否在30歲新開始找一個伴，她便耍太極謂：「30係年齡嘅數字，佢哋（囝囝）咪係我個伴囉，係終生朋友加囝囝。」囝囝沒催促你拍拖？她笑說：「佢哋成日叫我拍乜拍乜，叫我拍戲囉！」
另外，蔣怡昨晚亦是生第二胎後首復工，她說現在仍餵母乳，目前仍未收身。問囝囝改名未？她透露：「叫翁羽，有兩個羽，有毛有翼識飛，英文名叫Skye，男仔可以畀佢飛遠啲，唔似女仔咁黐身。」周汶錡則表示活動後會和老公及大兒子飛法國探爺爺及嫲嫲，她說：「老公唔捨得個細，想改機票cut短行程，但因為改機票好煩，不過𠵱家有facetime都唔怕！」
採訪：張俊銘
攝影：林賓尼
|
鍾意就快D Share啦！
|
|
|
