同大劉劉鑾雄噚日喺希慎爭執近十分鐘嘅短裙女子，就係27歲嘅o靚模許珮榆（Diva）。現場目擊者稱，Diva最初應該唔認得大劉，待認到之後先至爆一句：「咁有善心，就積下福！係咁喺度鬧人！嘥啲時間做有意義嘅嘢」所以大劉先至回敬呢句：「積你個福！積你老母！佢（子女）受傷係咪你賠呀？」
Diva係混血兒，擁有一半葡萄牙，一半新疆血統，因為佢爺爺係葡萄牙人，而婆婆就係新疆人。09年出道，即獲演出無綫青春劇《四葉草》系列嘅《南華夢飛翔》，劇中佢飾演千金小姐。Diva後來簽約施念慈旗下，係陳靜（DaDa）師妹。
Diva於2013年推出性感寫真集《華麗美少女》，大賣35D巨咪；為求上位，前年參加ViuTv搞嘅《美選D.n.A》，佢被編入天使組，但最後落敗冇獎，Diva利用其知名度，不時返大陸登台搵錢。
Diva甚少更新ig或者facebook，對上一個post都喺今個月11日。至於Diva參加選美嗰時，就被揭18歲已有一子，又指其做過舞女，Diva一次回應稱：「我有心理準備，謠言止於智者，以前個男友有個小朋友，我哋一齊5、6年，小朋友都叫我媽咪，我哋關係好好，之後個男仔有外遇，個小朋友好可憐。我最青春嘅時間都畀晒佢，我哋16、17歲一齊，18歲一齊住，22歲分開咗。舞女？我冇做過，以前男友鍾意去夜場，我承認我成日去玩。」至於有傳Diva整容，Diva經理人代稱：「睇相冇乜唔同。」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
