無綫新一屆港姐上周喺將軍澳電視城進行首輪面試,今年佳麗質素好平均,先睇佢哋被起底八卦新聞,前年參加過ViuTV《美選D.n.A》嘅湯沛宜(Toto)雖已簽咗李霖恩做藝人,但仍報選港姐,佢做過舞台劇,亦同黃榕參加過健美小姐。噚日有讀者爆料指佢曾割雙眼皮、抽脂隆胸,下巴也僭建,最驚爆係佢做模特兒前曾喺中環夜場做公關,化名Holiday。
Honey Ho成黑馬
對於負面新聞,Toto淡定解話:「我以前肥時130磅,36D上圍,減咗肥,𠵱家上圍細咗,得番34E。我減肥收咗水,輪廓咪瘦咗,我有去做醫療美容,好似補濕水光槍、RF射頻,輪廓咪冇以前咁包包面,眼同下巴都係可以做機『碌』得大啲尖啲,冇整容。」Toto又否認做過夜場公關:「我有同朋友clubbing,佢哋邀請我去高級私人會所,一大班朋友慶祝聯誼,我冇做過陪酒。」
另一「黑馬」係23歲潛水教練Honey Ho,網民睇好佢入圍,Honey話:「我會繼續努力,為健康膚色女仔爭番啖氣!」美國返來參選嘅24歲ABC丁子田(Sara)被揭有「皇牌」,提名人係導演張堅庭,阿庭噚日話:「佢姑媽係我好朋友,佢八年前放暑假回港,佢細個嗰陣,我鼓勵佢返香港參加選美,話我會提名佢,今次有勇氣回港,我當然支持。」
撰文:馮仁昭
鍾意就快D Share啦!
|
|