電影《無雙》一眾演員周潤發、郭富城、孫佳君、廖啟智同張建聲等，噚日喺中環大館為新片進行發鈔發佈會，會上宣佈發佈5千、1千、5百及1百蚊面額嘅無雙紙幣，憑紙幣可到指定戲院換取戲票。片中飾演以「畫家」為代號嘅發哥同飾演偽鈔師「李問」嘅城城，更即場進行鈔票簽署儀式。
「10個郭富城都死」
《無雙》喺香港、泰國清邁同溫哥華取景，由去年5月拍到8月。城城透露發哥要拍槍林彈雨嘅戲，又要吊威也，不過發哥笑住話拍得開心，因為好耐冇拍：「以前拍呢啲要拍足半年，𠵱家拍兩個禮拜，以前導演諗到乜嘢就拍乜嘢，之後唔要一回事，因為貴咗，所以好精準。」問到拍動作戲有冇受傷？發哥打趣話︰「因為有運動，我身手好敏捷，就算有10個郭富城都死。」
城城大讚發哥拍開槍戲專業：「我最敬佩發哥，佢今次開好多槍，發哥特登搵教練重新訓練開槍。」發哥即笑住話：「以前開槍係斷估，做到老學到老，可能呢啲觀眾唔鍾意睇，因為太正統，可能以前好睇啲，𠵱家有姿勢有實際，學咗幾個月。」
談到做運動，兩人互笠高帽，城城大讚發哥fit，發哥就話跑步受城城感染：「其實我日日做運動係城城感染，拍《西遊記之大鬧天宮》嗰陣，佢夜晚拍完戲都喺房跑步，好犀利，我都有跑，跑到肝炎都冇咗，好神奇！城城係我啟蒙老師。」
撰文：馮仁昭
|
鍾意就快D Share啦！
|
|
|
