年前以A&F男模身份出道的無綫藝人郭子豪，早前在劇集《三個女人一個因》內大晒結實肌肉，令不少女Fans流晒口水！近月他「變本加厲」狂操肌，變身「綠巨人」，於本周六參加《2018 PCA PRO及香港健美及運動體適能錦標賽》「1st華南地區男子運動模特」組別比賽。
媲美年輕時的阿諾
來到比賽倒數階段，子豪努力收身，在距離比賽尚餘兩星期時，體重200磅的他，脂肪比例只剩下3%，身上肌肉淨重達110磅，18吋麒麟臂起晒青筋，朱古力腹肌相當明顯！英文名「Arnold」的他身形媲美年輕時的阿諾舒華生力加，相信比賽當日會更結實更爆肌！
戒口感覺似喪屍
子豪直言過去八個月經過不同階段的操練期，多次想過放棄，但每次都咬緊牙關捱過：「最開頭兩星期因為身體未適應，過勞搞到完全瞓唔到，到之後體重多咗60磅，脊椎同膝頭都覺得痛，到近排要做大量帶氧運動，之前半年冇特別做，所以依家分外辛苦。」最後階段來到最辛苦的收身節食期，子豪尚未要脫水，但已開始戒食碳水化合物，他直言感覺似喪屍冇晒精神：「咩都冇Feel，每日只係Gym，食嘢又冇味，真係咩欲望都冇晒！」
受傷似讓半臂
對他打擊最大是上月家中電磁爐爆玻璃被割傷手，要縫上20針，令健身計劃受阻，現時他瞞着醫生帶着指套操練，傷口隨時會再爆，他說：「右手手指尾都縫八針，而且埋口埋得唔好，醫生叫我抖到年底，但冇可能我堅持要比賽，好多人撐我，我背負好大責任，依家得番一半健身動作做到，亦要減重量，喺呢個咁關鍵嘅時候整傷，好似讓咗半臂咁！」他直言仍未趕得上最佳狀態，擔心影響成績，原本目標是小組冠軍甚至全場總冠軍，但現在心態隨緣，至少這九個月特訓已獲益良多。
場地：Goji Studios
----------------------------
東網巨星開咗ig喇，大家快啲follow
https://bit.ly/2JjSVcr
|
鍾意就快D Share啦！
|
|
|
