著名品牌Bvlgari昨晚在中環旗艦店舉行開幕酒會，鄭嘉穎及陳凱琳於婚後首次合體出席公開活動，由於昨晚雨勢越落越大，新任人夫嘉穎幫陳凱琳拿傘之餘，又為太太細心抹乾雨水，非常有風度。嘉穎更表示夫妻檔工作陸續有來，更公開承諾由太太負責管錢。
鄭嘉穎及陳凱琳今個月12日在峇里結婚，昨晚二人作婚後首次以夫妻檔出席活動，兩人身穿禮服，非常合襯。他們進場時剛好下大雨，原本保安為他們打傘，但因雨太大更有撇雨，嘉穎索性拿傘攬住老婆行紅地毯，之後又要記者等他為太太抹乾身後才接受訪問。
讚老婆慳儉
嘉穎笑言昨日只是「夫妻檔」的開始，他說：「嚟緊仲有，不過貴精不貴多，適合嘅先會做。」兩年前二人首以情侶檔出席活動時有指收80萬元，問到夫妻檔酬勞如何，陳凱琳覺得OK，記者問她今次的酬勞是否當家用？她甜笑說：「家用都係一齊用嘅！」之後嘉穎說：「我太太唔知當家係乜意思，我同佢講，以後我負責畀錢，你負責管錢，我太太……」講到太太兩個字，兩人相視半刻，然後一起甜笑。之後嘉穎繼續說：「老婆好知慳識儉，所以我好放心將盤數交畀佢管，佢精打細算。」
打算生兩個
嘉穎坦言為新片宣傳完畢後，就會與陳凱琳度蜜月，並且已經定好地方，不過他表示一定不會透露。問到會否趁機造人，嘉穎說：「係禮物嚟，幾時有都得。」之前，胡杏兒踢爆他鍾意囡囡，嘉穎死口否認：「仔女都鍾意，萬一第時生仔，個仔聽到咪唔開心？要公平，最緊要似媽咪。」陳凱琳即刻接口說：「似爹哋都好！」那麼她有打算生兩個，生夠一仔一女嗎？陳凱琳笑說：「冇得咁計，睇天父點畀，聽佢話仔女都鍾意，我都放心。」對於早前被指二人的愛巢正是他新購入的何文田物業，嘉穎表示只屬投資，現時已經放租。
同場的惠英紅提到下月27日獲頒銅紫荊星章，她表示已經跟好友鍾慧冰及林建明慶祝，而老闆楊受成在28日亦會為她搞慶祝會。但紅姐呻工作忙碌：「仲有幾日拍完劇集《鐵探》，之後返內地工作，跨年期間要演出舞台劇《玻璃動物園》。已經收到《玻璃動物園》劇本，成尺厚，做阿媽角色，由頭帶到尾，對白密密麻麻，頭同四肢嘅微絲血管都有爆，因為壓力大。」
另外，早前因wakesurfing出意外而令額頭受傷的阿Sa，表示傷口康復進度良好，現在日日用去疤貼貼傷口，昨晚因為出席活動，所以首次用遮瑕膏。問到男友石恆聰是否很緊張，阿Sa說：「搵咗整容醫生縫針，男朋友好緊張，個醫生係男朋友搵嘅。」問到男友會否不准她再滑水，她說不會：「我會小心，咁樣樣運動都危險，我買個頭盔囉。」阿Sa更表示早前趁有空檔，已經去了幾日蘇梅旅行。
採訪：馬建華
攝影：沈健程
|
鍾意就快D Share啦！
|
|
|
