無綫近年生意額大減，今年中開始裁員行動，消息稱目標由4,100人裁至3,300人。6月先喺TVBI開刀裁減60人，之後再解散體育組，跟住輪到配音組傳出大規模裁員，緊接再有指無綫16廠將結束運作，約20至30位員工被炒。
最新消息係今年3月先成立嘅海外頻道普通話翡翠台同TVB電台都會摺埋，前者喺加拿大當地下周一停播，其他地區會喺香港時間下周六。
開台唔夠半年
呢個普通話翡翠台主要係網上收費平台，用普通話廣播兼配上簡體字幕，除咗新聞報道，仲播有 《BB來了》等劇集同綜藝節目，不過都係配上普通話。由於屬於海外頻道，服務對象唔係香港人，所以係透過TVB Anywhere平台播出，估唔到開台唔夠半年就玩完。
據知呢個「整合」行動依然繼續，TVB8、TVB星河網站將會喺下月停止服務，myTV Super有個別頻道亦捱唔住要摺埋，好似直播新聞台同TVB旅遊台，睇嚟無綫真係要削減不必要開支，好似港姐盛事今年就縮皮，冇出埠拍外景，改喺香港景點拍攝。
撰文：馮仁昭
|
鍾意就快D Share啦！
|
|
|
