ViuTV《全民造星》選男神，年僅19歲嘅姜濤又靚仔又靚聲，成為呢個節目頂頭大熱。姜濤唔單止成功俘虜咗一班少女心，而且姜濤打入40強演繹歌曲《我多喜歡你，你會知道》時，星級導師火火同劉美君都被佢深深吸引，忍唔住向姜濤大派心心。
不過，呢個貌似彭于晏嘅小鮮肉，原本係200磅小肥豬，佢減肥成功變靚仔嘅故事，更加引大家對佢嘅注意。
日前姜濤喺柴灣接受《蘋果》專訪，講到佢細個係肥仔，原來係因為食漢堡食得太多！
姜濤話自己讀小學三年級開始，由於經常食老麥，令體重直線上升：「食咗兩個餐，過半個鐘又肚餓，臨瞓前又食兩個漢堡包，當時被人話肥仔係因為得意，唔會覺得冇自信，後來小學升中學，我肥到要見醫生，因為差唔多200磅，屋企人勸咗我年幾，我先正視呢個問題，而且當時暗戀咗個女仔。」
被對方拒絕先減肥？姜濤話：「嗰時以為自己靚靚仔仔，但睇番畢業相，發覺自己同人哋唔一樣，加上個女仔同第二個男仔一齊，對我打擊好大，因為嗰個男仔係靚仔，於是我就減肥，不過我唔識減，一係唔食嘢，或者食水果，食完係咁跑步，運動三、四個鐘，搞到虛脫，係唔健康嘅瘦，後來讀運動教練課程，我先知道點樣減。」而目前為止佢體重係152磅左右。
失去自信，除咗心儀對象已名花有主，姜濤仲要面對閒言閒語：「當時唔夠膽識人，搞到性格有啲孤僻，又唔識同人哋講嘢。」遇過乜嘢經歷？佢話：「記得讀中一，我因為太肥而爆呔，我去校務處拎一條新褲，但係冇我個size，我咪夾硬扣埋條褲，點知返到班房一坐低，個扣又爆開咗，自己都覺得唔好睇，開始冇自信，啲人見我就話『讀書又渣，樣又冇，又肥又蠢』，所以冇乜朋友，後來打籃球先識到一班有共同興趣嘅朋友。」
現時有冇拍拖？濤話冇，但有心儀對象：「我冇行動，如果我要做呢行，就要專心做好，如果拍拖，會分散注意力；反而有次搭巴士，我見番中學時暗戀嗰個女仔，佢依家肥咗，我見到佢都呆到唔記得落車。」
採訪：黃曉妍
攝影：陳慧安
攝錄：沈健程
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
