鄭嘉穎與陳凱琳日前在峇里舉行婚禮，昨日凌晨12時許，一對新人甜蜜返港，嘉穎在機場拖實太太步出入境大堂，陳凱琳則如小鳥依人黐實老公，二人又不時互相攬腰，平時cool爆的嘉穎全程笑到「四萬咁口」，對傳媒更有求必應，齊齊騷婚戒，甜蜜指數爆燈。
未慣被叫鄭太
陳凱琳笑謂在飛機上被空姐叫鄭太仍未習慣，想了一想才知對方跟自己說話，感覺好得意。問二人是否奉子成婚及想生豬仔？嘉穎表示有好消息會宣佈，又說：「豬年都有排都好嘅，豬仔好福氣。」陳凱琳則說奶奶未有給予壓力，順其自然就OK。問嘉穎接新娘時，唱《一千個願意》有何意思？他解釋：「我間唔中會喺屋企練吓歌，呢隻係練歌其中一隻，佢聽過話好鍾意，仲問歌詞係咪講佢，咁嗰日佢話想聽我唱歌，咁已經知佢想聽邊隻唱咗呢隻先至娶到老婆」
至於接新娘過程，嘉穎笑說要多謝一班姊妹手下留情：「我嗰啲（兄弟）掛住拍片，亦都唔多出聲，靠我一個人去……好似搞掂晒咁，所以佢哋都冇乜點難為我。」在旁情深望着老公的陳凱琳即時讚嘉穎：「好叻呀你！」那麼會否再度蜜月？嘉穎漏口風表示會再去旅行，但就笑着說：「梗係唔講你哋知」
有共識勤造人
另外，陳凱琳返港後立即投入工作，昨晚出席YSL活動。她表示：「因為結婚後都留咗幾日玩，都休息過，工作番都幾開心。」自言未習慣被稱呼鄭太的她，又笑言現在叫嘉穎做老公，有感動和毛管戙感覺。
陳凱琳與嘉穎返港後入住酒店，問陳凱琳是否新居未裝修好？她表示：「因為我同嘉穎都想relax吓，住酒店有人照顧，新居遲啲會住。」問她是否有生B計劃？陳凱琳坦言夫婦二人有共識，都想行這一步。但問到現在是否不設訪？她即尷尬笑說：「哎呀，唔好問我呢啲咁尷尬問題」
採訪：卓寶花、黃曉妍
攝影：仇志德
|
鍾意就快D Share啦！
|
|
|
