出爐港姐季軍丁子田（Sara）形象斯文大方，又報稱單身，當選後已被不少宅男視為最新女神。不過，現年24歲的Sara卻被發現今年4月與男友Mark蜜遊希臘愛琴海，Sara更與男友互拍性感照、又大嘆水煙，甜蜜程度爆燈。Sara曾表示銳意加入娛圈，令人不禁懷疑她與拍拖5年的Mark轉玩地下情。對於是否「掟煲唔掟蓋」，Sara雖然例牌否認，但表示Mark賽後仍有跟她聯絡。
丁子田在賽前已被視為奪冠大熱門，可惜因為廣東話不靈光，問答環節表現欠理想，最終只能屈居季軍。賽後，港姐三甲接受節目訪問，當時主持人問三人的感情狀況，冠軍陳曉華及季軍丁子田都表示自己仍然單身，同樣巧合地於參選前與男友分手，只有亞軍鄧卓殷大方承認有拍拖。而Sara更表示Long D（遠距離戀情）很難維繫，她很想在事業再努力一點，所以才忍痛跟拍拖5年的男友Mark分手，似乎Sara早已作好準備留港，在娛樂圈發展。
| 丁子田與Mark於希臘之旅嘆水煙，似乎相當享受。互聯網圖片 | |
外遊豪放
Sara的「已分宣言」言猶在耳，但《蘋果》昨日於Sara的Ig賬戶中發現，Sara今年4月仍然與男友Mark甜蜜地一齊去希臘的米克諾斯小島度假。據了解，當地是不少新婚夫妻度蜜月的好地方，而在該批照片之中，可以見到Sara跟男友每日都享受陽光與海灘，Sara狂晒泳裝，又反拍男友赤裸上身影相的型仔look，他們租了一架開篷Mini四圍逛，愛得如此煙韌纏綿，實在難想像兩人四個月後已分手。
最令人意外的是，外表斯斯文文的Sara旅行時更吸食水煙，而另一張相亦見到Mark又有食水煙，似乎是一口煙兩份食。除了於旅行時大晒性感照，Sara亦有上載去年與女性友人一齊玩cosplay的照片，相片中Sara穿上黑絲，大玩制服誘惑，亦展示了她豪放的一面。
昨日，Sara跟冠軍陳曉華及亞軍鄧卓殷一同出席公開活動，Sara強調已跟Mark分手，但承認再見仍是朋友，她說：「我哋喺大學認識，我哋嘅朋友都係一樣。𠵱家冇乜傾偈，但我贏咗，佢都有恭喜我。」問及相片中，Sara跟男友相當甜蜜，不似會分手，她解釋說：「都係happy memory，當時係好開心。」那麼Sara有吸煙習慣嗎？Sara否認：「食水煙係希臘文化，我平時唔係食煙嘅人。」
後台強勁
無可否認，Sara十分有才華，四歲時已獲鋼琴冠軍獎項，又是大學的排球女將。她於美國名校密歇根大學修讀生物心理學、認知科學和神經生物學，畢業後於美國紐約任職藥劑顧問兩年。再加上Sara後台強勁，由張堅庭擔任港姐提名人，其姑媽是甘草演員丁主惠，而Sara另一位姑媽Judy，更是無綫高層樂易玲的好姊妹，絕對有利Sara日後於無綫發展，難怪Sara當選後要即時與男友劃清界線。
採訪：嵐山
|
鍾意就快D Share啦！
|
|
|