現年46歲嘅洪欣與細佢9年嘅內地老公張丹峰結婚9年,日前有網民提出五大疑點,質疑張丹峰同嫩口經理人畢瀅有曖昧,之後張丹峰透過工作室發律師聲明,澄清傳聞全部虛構,而洪欣開腔撐夫外,亦承認畢瀅係佢哋一家生活嘅親密夥伴。
任阿女揀精品
張丹峰傳出疑出軌後,本報噚日就喺銅鑼灣撞到佢同老婆,同埋四歲囡囡張晞彤行街,當時大概3點幾,兩公婆都以cap帽遮樣打扮,而洪欣仲一臉素顏現身時代廣場,張丹峰就負責抱女,佢哋首先入咗一間時裝店,行咗一陣就搭電梯去咗一間兒童精品店。囡囡入到舖頭就好有主見,由爸爸抱住揀背囊仔、袋仔,之後更落地揀Hello Kitty精品,兩公婆都好有耐性任囡囡慢慢揀。
隔咗一陣,由洪欣埋單走人。佢哋離開嗰陣,就聽到囡囡好嗲咁叫「爸爸爸爸」,而張丹峰一臉冧樣,亦有同老婆咬耳仔,記者上前想搵佢哋做訪問,洪欣就耍手擰頭:「唔好意思,唔做訪問,冇乜嘢,唔該晒。」而張丹峰喺隔籬猛話「唔該晒」,就行到Sogo後面一棟大廈搭𨋢上樓。
撰文:馮仁昭
鍾意就快D Share啦!
|
|