甄子丹在08年拍《葉問》後，聲名大噪，被封「宇宙最強」，而且一強就是十年。十年人事幾番新，子丹繼續開拍《葉問4》，不過他亦主演及監製校園片《大師兄》，一代宗師由講「手」變成講「書」，從武館強到入課室。不過，回首那些年，子丹坦言自己都有整蠱老師，而且問題多多：「成日上堂表演功夫，又走埋先生度起飛腳，仲會走埋佢面前撩交打！」
撰文：陳杰
攝影：葉君海
香港教育近年問題多多，殺校、校園暴力、DSE、學生自殺等問題引起社會關注，身為人父的甄子丹亦相當關心，開拍電影《大師兄》探討教育議題。子丹日前接受《蘋果》訪問，解釋為何轉拍校園片：「我一直想拍校園題材，想利用電影探討一下，父母有邊度不足，學生到底有乜人生意義，希望佢哋睇完套戲，帶出一啲訊息，同時或者探討到敏感話題。」
訪問當日，子丹身處學校課室取景，勾起了他在美國讀中學時的回憶。他自言當年走堂是家常便飯，是個「曳到爆」的學生：「我有整蠱老師，好似拍電影咁。先生好少嚟上堂，好多時都係代課老師，唔係好專業，hea教囉，學生更加hea學。」師資良莠不齊，他又生性反叛，子丹大爆自己曾向老師「挑機」：「大家上堂喺度玩，我𡃁仔時成日上堂表演功夫，又走埋先生度起飛腳，仲會走埋佢面前撩交打，做一啲過份行為，係『小學雞』，𠵱家諗番好幼稚，真係嘥咗嗰段時間。」
| | |
後悔冇讀大學
回首從前，子丹覺得學生討厭返學，本身當然有責任，但老師都要檢討。他說：「話分兩頭，學生同老師必須互相有passion，我唔係怪當年啲老師，因為我唔係標準學生，如果老師有主動啟發我，可能我會熱愛返學，就唔會嘥咗幾年時間hea讀，最後冇讀到大學，我好後悔，覺得好嘥。」
如果命運能選擇，子丹的校園生活會怎樣過？他說：「要我從頭嚟過，我會享受校園生活，𠵱家會諗番點解當時唔珍惜。同校園相比，出嚟社會做嘢真係好大壓力、好複雜，返學係好開心，同朋友一齊好歡樂。其實，考試測驗唔係好大壓力，都係自己畀自己，最緊要盡咗力，將來成就唔係base on分數。」
子女聽教聽話
可惜讀書在香港絕對不是子丹所想那麼簡單，家長給予子女的壓力，有時候實在遠遠超過少年人的承受能力。子丹坦言自己幸運：「我好lucky，三個子女都讀書，大仔讀書叻，成績好，囡囡從來自動自覺，唔使我擔心，細佬都好乖，所以我好感謝佢哋嘅老師。」事實上，為了以身作則，子丹於婚後所拍的電影與女演員均沒有親密戲份，就是為免為子女帶來不良影響和令他們被同學取笑。子丹為了他跟前妻所生的大仔甄文焯有更大機會讀名校，他刻意為大仔及前妻於九龍區豪擲逾千萬置業。幸運背後，其實子丹都做了不少工夫。
那麼子丹算是怪獸家長嗎？他衝口而出直認：「怪獸家長，都幾……每位父母都想子女就算唔出人頭地，都望子成龍，我都希望佢將來出色。」子丹的14歲女兒Jasmine能歌擅舞，亭亭玉立，子丹笑說將來不會是「呷醋外父」：「我希望唔係，唔可以話呷醋，緊張同錫個女箒。」
對新人要求高
除了教育子女，子丹對演藝圈後輩亦相當緊張。湯鎮業一對孖仔湯君慈及湯君耀都有演出《大師兄》，兩人早前對傳媒表示，只要子丹在場就會壓力暴增，因為他要求非常高，而且工作時從不會玩手機。子丹亦直認是嚴師：「呢個圈需要新人，與此同時，始終新人孭起套戲有一定風險，我選角時幾嚴，cast咗好多，每個都有特質，寫故事時針對佢哋性格。我戲中就做埋導師培訓佢哋，用我經驗、能力去輔助佢哋。」
化妝：諺瞳˙小白
髮型：Jacky Leung of IL Colpo
|
鍾意就快D Share啦！
|
|
|
