後日係48歲鄭嘉穎同27歲陳凱琳（Grace）嘅大日子，婚禮會喺峇里島嘅Bulgari Resort Bali舉行，可惜佢哋只係請咗雙方親友同少部份嘅圈中朋友參加。不過近日印尼遇上地震，旅遊勝地峇里島隔籬嘅龍目島噚日再發生6.2級強烈地震，有多幢建築物倒塌。但嘉穎同Grace真係勇，依然如期出發去峇里島結婚。
度完蜜月兼慶生
其實有份去婚禮嘅親友同圈中朋友，都問過嘉穎同Grace會唔會改地方，不過主人家唔驚，佢哋都惟有照去啦。因為乜都訂好晒，Bulgari好似仲會對佢哋婚禮有贊助。下星期三仲係嘉穎49歲生日，原本佢哋諗住結完婚，就喺峇里過埋生日，不過𠵱家就要睇睇地震嘅最新情況，再決定留唔留喺當地過生日同度蜜月。
鄭嘉穎嘅老友黃智賢前晚喺中環出席餐廳活動，被問到老友喺峇里嘅婚禮，黃智賢話會去。至於有傳會改地點？佢話︰「我唔答等佢哋自己回應。」至於峇里發生地震，問佢擔唔擔心危險？佢話︰「其實嗰度地方好大，應該影響唔到。」仲話準備咗賀禮，不過要保持神秘感。
撰文：馮仁昭
|
鍾意就快D Share啦！
|
|
|
