星級媽咪陳茵媺（Aimee）早前帶住三個寶貝仔女返加拿大娘家，留低老公陳豪（阿Mo）一支公在港搵錢及準備無綫新劇《殺手》。
Aimee離開身邊四個星期，今晚風塵僕僕帶住三個仔女回港，班機延誤大半小時，阿Mo約於八時十分現身機場，在接機區守候約四十分鐘。雖然阿Mo掛住四位寶貝，一臉焦急不時望手機，但面對劇迷集郵都無任歡迎。當見到老婆推住BB車步出入境大堂，阿Mo即箭步上前同老婆咀嘴，再逐一親親子女們，一家五口合照時大仔怕醜走到嗲哋身後，二仔即離開BB車搵哥哥，反而細女就最淡定，阿Mo與太太即時一人抱起一個，場面勁溫馨。
「梗係錫老婆先！」
未見到老婆前阿Mo先接受訪問，自言是「湊仔公」的他說：「呢段時間好無聊，除咗準備新劇，都有同仔女視訊陪佢哋食早餐。（請假接機？）咁啱放假，聽日開工喇！」阿Mo指太太一拖三無助手，盡量避免錯過家庭時間點都要接機。問到一陣見到四位寶貝先錫邊個？阿Mo笑言：「梗係錫老婆先！」問會否趁暑假陪阿仔女？他說：「等佢哋應付埋時差，休息、做吓功課要開學喇。都有計劃家庭旅行，但要睇大仔個時間表，同埋唔可以係長途。阿Mo笑言有機會是聖誕假期，在此之前會先安排同老婆二人世界，問會否趁機造人？阿Mo以招牌笑聲回應：「你曳曳呀！（再熱鬧啲？）我屋企已經好熱鬧！」
而Aimee推住BB車載住三歲的二仔及兩歲細女返港，四歲大仔則乖巧跟實媽咪並自己拉行李，一行四人行李相當輕便。問到此行是否辛苦？Aimee笑言：「有啲攰呀，機上面有少少扭計。（阿Mo話好空虛！）佢掛住我哋，我哋都好掛住佢呀！（玩到唔記得嗲哋？）當地有公公婆婆同啲長輩，又多戶外活動，每日都有新鮮事，不過佢哋都有話Miss Daddy。（好輕便？）因為寄咗行李，得一箱半係行李，其他都係手信，有50包都係畀阿Mo嘅咖啡。」
|
鍾意就快D Share啦！
|
|
|