旺角街頭日前上演疑犯與警員角力場面。有巿民喺fb討論區上載一段短片，內容顯示係星期六夜晚10點左右，旺角奶路臣街龍豐Mall藥房對開馬路，一開首就見到3個便裝警夾手夾腳捉實一名黑背心男，其間雙方不斷爭拗，你來我往。
黑背心男不斷要求三個便裝警鬆手，又叫對方出示委任證，「你㩒住我，我拎唔到嘢呀！」其中一名便裝警一度勸喻：「 你冷靜啲好唔好 ？」隨即被背心男反駁：「我冇郁過企喺度，家係你哋郁手呀，你哋三個郁我一個呀，警察大晒呀？」反過來要警察「鬆手後先好郁」，又話要向警察投訴課投訴。
其後背心男情緒開始激動，不斷掙扎：「你放手我咪冷靜咯，你郁手我點冷靜呀？你哋三個恃人多呀？我吐口水㗎！」未幾即向其中一個便裝警吐口水，該警員見狀取出手銬，三警同中途加入增援嘅兩個伙記，合共五人將背心男推向欄邊，雙手放背後鎖上手銬，之後再推疑犯貼向藥房玻璃櫥窗，防止對方再有過激行為。
背心男不甘被鎖，連珠炮發：「差人打人呀！我要睇你證件，我要打（電話）去警察投訴課，你冇合理懷疑唔落得我鎖，我好痛呀，襲乜警呀？」警員只講咗一句「先生，你唔好講粗口」，同埋「已經同你講咗（罪名）！」之後冇理會背心男大叫，影片之後就咁完咗，冇交代事態發展。有大批網民質疑警察無出示委任證就捉住背心男唔放嘅做法，認為有不妥。
我哋問過警方，就話旺角警區特遣隊周六晚上9點半喺奶路臣街進行反罪惡巡邏期間，見到一個40歲姓冼男子形迹可疑，又喺佢身上搜出一支咳水同一把生果刀，其間對方向警員吐口水襲擊，最終嗰個男人涉嫌襲警、藏有第一部毒藥、藏有攻擊性武器被捕。如果差人解釋對方有武器，所以要捉實佢唔畀對方郁，網民又收唔收貨呢？
你敢爆，我敢獎！ 立即WhatsApp《蘋果》24小時爆相爆片熱線或致電：63836568
|
鍾意就快D Share啦！
|
|
|
