台灣男神彭于晏今年都35歲人，早排傳同有「國產瑪麗蓮夢露」美譽嘅許晴搭上，班半老徐娘梗係開心到通頂跳大媽舞慶祝點解？個個都恨似49歲嘅許晴咁，喺「閉月收經」前有機「尋于食晏」開心吓。只係嗰班自封「彭太」嘅粉絲就嬲到眼火爆，狂鬧「寧願老公係基，都唔接受佢同個熟女一齊」，感覺係睇住天山童姥生吞唐僧肉咁，個個變咗孫悟空要三打狐狸精呀。
放下屠刀立地成佛
慘變「小三」嘅許晴足足捱炳16日，就快被咒死前，好在彭于晏出嚟普渡眾生，話同許晴「只係好朋友」，即係唔係炮友，叫大家放下屠刀立地成佛。為咗補償啲「彭太」心碎咗咁多日，有云「割肉餵鷹」，佢就二次創作「露股慰fans」，未到中秋就喺新片度晒八月十五畀大家「送」月餅，真係善哉，善哉。
講得公道啲，許晴嘅年紀同彭于晏相比的確係熟咗啲，但晴姐姐不失為風韻猶存、胸挺籮趷嘅「姨級Baby」喎，睇佢個樣就知佢空肚食燕窩，同彭于晏食火鍋一定揀「採羊補陰」嘅羊腩煲啦。唔好話nuts哥只係敬老，實情晴姨喺戲裏面確係令人肅然起敬， 唔着under、伸長條肉腿畀彭于晏拮不老針嗰幕，全身散發羶味，唔係，應該係風騷個騷味至啱，完事後仲再送紅底做紀念品，此情此景，彭于晏係唐僧都未必hold得住，何況佢正值血氣方剛之年，唔行動都心動啦。
彭于晏又好絕情話同晴姨係「冇可能」，呢個世界「Never Say Never」，呢刻同晴姨「No Possibility」啫，但唔代表同其他姐姐冇可能喎，其實同姐姐拍拖好處多， 睇吓鍾欣潼、洪欣、楊千嬅、鄧麗欣、鍾麗緹同伊能靜，未嫁嗰啲就放閃盲彈，嫁咗嗰幾個就幸福到變天后，再好命啲就唔怕醜生到九十九，況且男神早有鋪姐姐癮，之前同大佢兩年嘅G奶蔡依林、大七年嘅舒淇、仲有大佢一年嘅張鈞甯咪一樣有景轟，只係姐姐嫌佢外硬內軟先冇下文啫。
衰在「要硬時佢就軟」
嗱嗱嗱，外硬內軟唔係人身攻擊，擁有1米82身高、非強壯能形容嘅臂彎、44吋巨無霸胸肌、嗰排堅過鋼板嘅腹肌、完美身形媲美復仇者聯盟班超級英雄嘅佢，外圍得、核心仲勁，有哥倫比亞大學嘅經濟學位，能操流利英語，入水能游、出水能打，呢種最接近神嘅男人衰在要硬時佢就軟囉，畀人搞兩搞，直頭謝晒，講緊係佢隻耳仔，做慣裙腳仔，太聽阿媽話。
彭于晏現實中冇孫悟空、沙僧同豬八戒保護，但就有阿媽同兩位家姐當佢係金叵羅咁錫住，無論在公在私都安排好晒，搞到佢性格同童顏一樣，嗰次佢同台灣妹林珈安發展到夜麻麻同處一室， 彭媽慌死個仔必有損失， 一句「no」就將呢段一夜情「game over」，食咗落肚嘅「晏」肉都要𦧲番出嚟，所以話想嗒彭神，真係難過取西經。
|
鍾意就快D Share啦！
|
|
|
