朱晨麗開火鬧網友：憑乜扮專業！
無綫劇集《特技人》前晚播出由方紹聰上演「火燒特技人」一幕帶起全集高潮，豈料變成「怒火」由戲內燒至戲外！有網民質疑以CG電腦特效代替真火，辣着女主角朱晨麗與網民開火，鬧爆有人不分真假胡亂批評，同劇的關楚耀及傅嘉莉亦力撐拍檔。
《特技人》開播以來好評不斷，除了朱晨麗晒線演出惹熱議外，劇情講述幕後特技人的辛酸，亦被網民大讚題材特別。前晚播出一集，飾演特技人的方紹聰拍攝一場「火燒人」的特技場口時，因門鎖突然失靈加上導演遲遲不喊停，令他燒足數十秒慘變火球。劇集播出後即成為網民熱話，但有人指「火燒人」橋段疑造假，只以後期的電腦CG效果加上假火，並指非由方紹聰親身上陣拍攝，直斥「掛羊頭賣狗肉」。
晒花絮片：演員用心演出
面對種種留言，朱晨麗睇到佛都有火，同樣飾演特技人的她立即於網上回應，並引起一場罵戰！她上載了拍攝「火燒人」的花絮片段，片中見親身上陣的方紹聰穿着噴有防火膠的戲服，全身着火後衝出門外，即獲工作人員以滅火筒救火，力證絕非使用CG效果，並反指網友是非不分：「連CG同真火都分唔清嘅朋友，憑乜嘢喺度扮專業話我哋都係假嘅？每個演員都係用心去演出，請唔好用一句說話就抹滅咗所有付出！特技人，都係玩命的。」
罵戰爆發後，一眾同劇演員齊齊開腔力撐，傅嘉莉接受本報訪問時表示，支持朱晨麗為拍檔抱不平：「我都好明白點解佢咁大反應，因為佢喺入面都有好多特技場口，明白當中嘅辛苦。我都好支持佢為大家發聲，但我冇睇網民留言唔方便評論，但就希望香港人可以少啲抨擊。」至於關楚耀昨晚出席活動時讚方紹聰相當專業：「當日我都喺現場，真係好佩服佢！公司有安排特技人，但佢都堅持自己嚟，雖然佢平時好似成日玩玩吓，但做嘢嗰陣好認真，所以啲網民唔知真係唔好亂講。」
方紹聰親身上陣暈暈哋
對於被指「造假」，方紹聰回應時表示有留意網友評論，但沒有因被誤會而不快，只希望觀眾能看到拍攝的真實情況，明白台前幕後的付出：「我見同劇好多演員拍特技場口都親身上陣，所以自己好想試吓。初時武指淨係畀我燒手，後尾見我狀態唔錯先畀我燒全身。（擔心有危險？）拍嗰陣冇諗咁多，但當時聞咗好多氣油有少少暈，同埋搽咗防火啫喱隻手好痹。」《特》劇監製王偉仁亦回應指該場口以真火拍攝，絕對不存在CG效果，並強調本已準備了替身，但方紹聰希望親身演繹，故經過與特技組溝通，確保完全沒有危險下才批准。
|
鍾意就快D Share啦！
|
|
|
