早排超強颱風山竹襲港，破壞力驚人，唔少人都話對呢個20年一遇嘅「果后」印象難忘，其實今屆落選港姐工藤佑采又何嘗唔係選美界嘅「山竹」？淨係睇佢決賽當晚黑住面、甩晒Beat咁跳舞，呢股「超強台風」絕對係港姐有史以來從未有過，唔止網友瘋狂洗版，連張敬軒更為佢攣都拗番直！至於破壞力如何喇喎，問黃心穎就最清楚！
講真，比起今屆港姐三甲選咗出嚟都冇乜人噏得出全名，工藤佑采雖然乜獎都冇，但選完冇耐就登上娛樂頭條，風頭有幾勁都唔使多講！咪以為呢啲只係工藤妹死好命喎，事實上，若果唔係佢咁夠薑，敢喺港姐呢個大騷黑面跳舞，將多年港姐潛規則、美貌與智慧並重完全一夜打破！
落選跳舞？EQ大考驗！
冇錯，落選咗仲叫人出嚟跳舞，呢個安排同叫分咗手嘅前度女友上台為依家條女高歌一曲慶生，又或者叫人扮到兔女郎咁款去搭港鐵差唔多，即使唔係人生改進課程，都一定係EQ大考驗！工藤妹肯跳已經好畀面，偏偏師姐莊思明同黃心穎竟然加把嘴，尤其黃心穎講句：「我仲以為黑面係佢嘅跳舞態度，如果係做人態度就唔抵爭。」結果梗係辣㷫工藤妹作出大反擊，寸爆佢堂堂香港小姐三甲，連閱讀理解都唔識
眾所周知，落選港姐十居其九嘅下一站就係簽無綫做藝員，唔係掟去《東張西望》揸咪做吓扒（Standupper），就係做吓劇集布景板咁。工藤佑采喺港姐直播期間夠膽死擺出一副玄壇咁嘅口面，就知佢早已經豁咗出去，何止唔將港姐監製放在眼內，直情連無綫都未驚過，亦唔期望喺TVB有乜發圍，佢使怕你「是非精」黃心穎？可惜吖，喺工藤妹還拖之後，黃心穎拋低一句「唔係好想同佢個名扯上關係」就此笠水，既然係咁，當日又做乜加把嘴呢？
人人有權黑面
鬧完黃心穎，氣都唔使抖，轉頭撐爆馮盈盈，喪插莊思明，但坊間就對工藤妹大感興趣，仲揭露佢可歌可泣嘅身世。話說工藤妹日籍生父喺個女一歲未夠已經走佬返日本同正室生活，工藤妹同母親只好相依為命，直到佢16歲，媽咪死於交通意外，為生活、為生存，工藤妹年紀輕輕就出嚟做Freelance Model自食其力，絕對值得肅然起敬呀！
工藤妹喺呢種黑暗歲月成長，養成咗一副既啃又辣嘅性格，好似佢呢種咁有性格嘅港姐，絕對係45 年一遇嘅極品！睇吓張敬軒唔單止Cap低佢個黑面樣做頭像，仲為「選美黑面」呢種行為攣都拗番直， 重新賦予一種嶄新嘅解讀添！軒仔話喎，「咁人都有黑面嘅權利嘅。」佢又講得啱呀，唔通淨係黑臉琵鷺先有擺臭臉嘅特權咩？
----------------------------
東網巨星開咗ig喇，大家快啲follow
https://bit.ly/2JjSVcr
|
鍾意就快D Share啦！
|
|
|
