劉德華昨日於尖沙嘴洲際酒店宣傳12月舉行的演唱會，其間他又唱又跳，又重溫開騷時經典的爆呔場面，甚至連有關女兒的問題都回答，心情甚好。個唱門票今日公開發售，華仔坦言有心理準備網上搶飛時會冧server，而他重提墮馬一事時，更坦承患上嚴重創傷後遺症：「對乜都有陰影，例如停車又驚後面架車撞埋嚟。」
劉德華將於12月15日起於紅館舉行20場「My Love Andy Lau 劉德華World Tour」，昨日華仔以棟篤笑形式在尖沙嘴宣傳，舉行了一個35分鐘的小型演唱會，其間播出他以前演唱會的造型，包括空中飛人、跳拉丁舞等，對於最難忘的爆呔爆褲相片，華仔形容：「係不可修補的裂縫。」並表示自此做褲時會做闊一點。
| | |
60歲Junior幫抹身
唱完歌睇完經典畫面，華仔主動重提墮馬一事：「坐飛機返嚟香港俾一個氣泡包圍，一到香港之後，化妝師就畀四個口罩我，話啲人實會影你，你𠵱家好醜樣。之後喺醫院過年廿八洗邋遢，一班護士長就話幫我洗頭抹身，資深幫我洗頭，junior就幫我抹身，但估唔到junior都60歲。」當螢幕播出華仔墮馬後康復期間撐枴杖的照片時，華仔說：「張相出咗之後，都好多人模仿拎士的嘅相撐我，點知士的商就想趁呢個機會問可唔可以長期合作，我呸！其實我哋搵sponsor好嚴格。」
鏡頭前華仔談笑風生，問他現時身體是否已完全康復？他苦笑說：「喺醫學角度嚟講，神經線破壞咗係唔能夠恢復，我腳趾尾有時會痹痹哋，令我心情有啲煩，好似蛀牙咁。」並坦承墮馬事件令他有嚴重創傷後遺症：「對乜都有陰影，例如停車又驚後面架車撞埋嚟，幾嚴重㖭，自己一路落嚟都覺得樂觀啲啦，唔好諗咁多。」
演唱會不設公開發售，只設網上、流動應用程式及信用卡電話訂購，華仔表示早已預料有冧server的可能：「每樣嘢都要試吓，同好多單位都研究過，其實上年都討論過，起碼阻截到唔好喺街度你爭我奪。」他表示如出現問題，不排除會停止售票：「如果有一啲不正常嘅賣票情況出現，我覺得要諗一諗，睇吓係咪要停咗佢嚟過。」
七嚿腹肌Call唔番
過往華仔在演唱會中有好多飛天遁地場面，他講笑說今次減少動作：「今次淨係瞓喺度，會以安全為主，仲專登邀請咗人用耳機指揮，提住我走位，希望預多少少時間踩場。」嘉賓方面，華仔歡迎大家自薦，同時亦介紹了演唱會的「唯一嘉賓」，正是自己一比一的figure，他說：「都唔知點解七嚿腹肌鴛鴦，但未來日子裏面睇唔睇到七嚿就未必得，因為已經係七年前嘅事，未必返得到嚟，曾經都call過佢，招呼都唔打就cut咗我線。」
採訪：卓寶花
攝影：林賓尼
|
鍾意就快D Share啦！
|
|
|
