幾乎每個全職家庭主婦平日中午都會打開電視，唔睇，都會聽下《都市閒情》，就連唔少巴打閒時都會因為節目一眾美女主持人，而開電視追一下。估唔到由1992年開始足足陪咗大家26年嘅《都市閒情》，將會喺10月「壽終正寢」，改為新節目《Big City Shop》，明目張膽力谷大台旗下網購平台、贊助產品。消息一出，唔單只觀眾一時接受唔到，就連節目工作人員都心酸透露：「其實大家知道嘅嘢唔多，消息都係從報章得知，因為公司未同我哋講。」
雖則《都市閒情》唔係啲咩叫好叫座嘅高收節目，但咁多年嚟佢的確帶咗唔少共同回憶俾大家，起碼大家都聽過娃娃舜，留意過安德尊大戰李錦聯，𥄫過宋芝齡、姚嘉妮、彭慧中美腿。所以，又一個集體回憶走向終結，難怪網民會話：「《都市閒情》都收檔，我唔想做人喇」、「世上唔再有黑絲姚嘉妮」、「無阿中唔睇」。
另外，據《都市閒情》工作人員透露，今次節目結束嘅消息嚟得好突然，都係睇報導至知，大台仍未正式通知員工：「公司未同我哋講，亦冇收到消息會冇得做，我諗公司好快會通知我哋。希望一直支持《都市閒情》嘅觀眾繼續支持我哋」
其實相信大家都有耳聞，大台搞《Big Big Channel》同Big big shop蝕得好甘，但又唔想腰斬止血，唯有出下策將人手裁得就裁，先有體育組、配音組、戲劇科、道具組，而家就輪到將商業利益有限嘅節目「轉型」，例如今次嘅《都市閒情》「轉型」為Big big shop服務，希望可以將師奶觀眾化為Big big shop嘅潛在客戶，力挽狂瀾催谷營業額。不過，只要上Big big shop望下，就會發現啲價格，似乎又唔太適合會睇TVB嘅師奶觀眾喎。
講真，睇得出大台真係好想喺香港網購上發圍，所以之前有傳大台有意取締台慶show（台慶日為11月19日），學內地大搞雙11光棍節分淘寶一杯羹，絕對並非空穴來風。
BTW，唔知仲會有咩節目步《都市閒情》後塵呢？兒童節目？《勁歌金曲》？
立即下載Apps，隨時隨地睇盡時政專題、深度偵查、娛樂熱話！
按此連結：http://bit.ly/next28app
女主持們的美腿，是節目看點之一：
來源 source: http://nextplus.nextmedia.com
|
鍾意就快D Share啦！
|
|
|