單親媽媽吳綺莉一直同囡囡吳卓林相依為命，自上年卓林認出櫃戀同性外籍女友Andi後，母女感情出現裂痕，卓林仲同Andi出走去加拿大，幾個月嚟未肯返屋企。
吳綺莉上個月45歲生日，卓林未見送祝福，反而卓林早前喺facebook忽然改姓氏，由「Etta Wu」變成「Etta Zen」。吳綺莉英文姓氏係「Wu」，而成龍原名係陳港生（Jackie Chan），好似陳日君樞機就係叫Joseph Zen。卓林喺吳綺莉生日第二日，就貼單人相兼晒手上婚戒同留言：「I know who you are. I know you know what happened.」
避談女兒
已有三個幾月冇更新微博嘅吳綺莉，中秋節上載一幅「月餅森林」畫作，前日再貼出低胸、騷腿兼露背嘅靚相，留言：「很久沒開工，好開心。」致電問生日有冇收到卓林祝福？吳綺莉以短訊回覆：「大家都要開心。」問到生日過得開唔開心？佢就表示：「天天都一樣。」對於卓林喺fb改姓，吳綺莉只係用心形同花花圖案回覆。祝佢開心同身體健康，吳綺莉話：「大家都要。」
撰文：馮仁昭
|
鍾意就快D Share啦！
|
|
|