鍾鎮濤（阿B）穿上皮褸皮帽加黑褲黑鞋、咬着牙籤，依然是《新精武門1991》內周星馳的拍檔「瀟灑哥」。近日阿B接受《蘋果》邀請，再以瀟灑哥造型受訪，他大談與太太范姜與日俱增的感情，不諱言不想三名女兒出嫁……阿B經歷過高山低谷，看透人生的他確是瀟灑。
撰文：王連連
攝影：陳俊強
鍾鎮濤除唱歌了得，要他chok亦不成問題，他在電影《新精武門1991》飾演的「瀟灑哥」chok住賣點心，形象深入民心。27年後，阿B應《蘋果》邀請，再以瀟灑哥造型現身茶樓，現場茶客都被他逗得開懷，不少女士更找阿B集郵。
| | |
范姜賢內助
外表瀟灑的阿B，從前飽歷離婚及破產等驚濤駭浪，是太太范姜成就了他瀟灑一面。阿B於02年申請破產，范姜仍不離不棄，更替他照顧與前妻章小蕙的一對子女。雖然阿B在公開場合很少冧太太，但心中很感激對方：「佢係一個守護天使，喺我人生最低潮時候出現，我哋到𠵱家感情有增無減，我以身相許已OK我已經蝕晒底，哈哈……」
范姜對阿B無微不至，阿B豈會不知，他說：「你睇我今日做專訪，好似好輕鬆，其實佢事前周圍幫我搵番件衫，又將我入面件tee剪到變番瀟灑哥，呢頂帽仲要搵好耐。」不過人冇完美，阿B對老婆亦有意見，他笑說：「佢唔哦我已經好感動，最感激佢唔哦我嗰時，我諗每個屋企都係咁上下，總有嘢哦，又唔係日日咁，可能每個月哦幾日，呢啲都係套餐。」
阿B眼前這一份「套餐」，還包括了四名子女：鍾嘉浚、鍾嘉晴、鍾懿和鍾幗。他視與前妻的28歲大仔嘉浚為好友，父子時常見面傾心事。至於還在讀書的三位千金，阿B坦言不欲女兒太早嫁：「個個老竇都唔捨得啲女嫁，我諗住唔畀啲女嫁，要陪老竇，如果唔係生嚟做乜？大女差唔多畢業，我希望陪住啲女讀大學，鍾懿跟學校旅行去一星期，我拖咗幾年先捨得畀佢去參加，總之唔喺身邊，個心囉囉攣。」子女相繼長大，阿B自評現階段是他一生中最美滿幸褔的時候。
小鳳姐鼓勵
除了家人，朋友對阿B來說亦很重要。阿B破產時，梁朝偉每天陪他、張國榮則向黃百鳴提議找他拍電影《九星報喜》，而曾屬同一間唱片公司的徐小鳳亦有鼓勵他。阿B回憶說：「有次喺生果舖撞到小鳳姐，佢同我講：『阿B，唔緊要，呢個時候算係人生低潮，如果好平穩咁過，到老咗就冇嘢講，如一張白紙。你呢啲會過去，高高低低應會有。』但當時我唔受落，只能夠死頂，我做娛樂圈，唔頂得順點娛樂人。」
提到小鳳姐，阿B還想起了一件趣事。「以前一齊喺錄音室，小鳳姐最叻幫我哋叫外賣，因為人哋未必送，但佢一打電話：『我係徐小鳳，我想要個乾炒牛河，又想要乜乜乜』，啲人就會送嚟。」只記開心事，也許就是阿B能夠瀟灑的原因。
偉仔217成員
鍾鎮濤縱橫音樂、電影圈多年，相識滿天下，早年與杜德偉、梁朝偉和呂方已是好友，近年更與張學友等約18名藝人，組成「217」群組，經常相約去玩。提起「217」的成立，阿B大爆起源於數年前跟曾志偉等好友去旅行的趣事：「嗰次其中一個朋友冇去，吉咗間房，嗰間房係217號，之後每晚大家去嗰間房聚埋，但嗰間房永遠都瞓滿人，因為個個醉咗，返唔到房，嗰時開始呢group好朋友就叫『217』。」
阿B將於下月舉行演唱會，「217」好友紛紛報名想到場支持，阿B怕順得哥情失嫂意：「今次演唱會嘉賓好難搞，係多得滯，溫拿就一定會有，一班朋友都想玩。我安排好多嘢玩，嘉賓冇壓力，觀眾又睇得開心。」
場地提供：聯邦郵輪宴會中心
|
鍾意就快D Share啦！
|
|
|
