由謝霆鋒擔任導師嘅選秀節目《中國好聲音》日前連播兩期，上星期五一期係七強爭霸；啱啱過咗嘅星期日播出嘅就係七強入五強嘅比賽，而呢一期亦係最後一期喺錄影廠錄影，下一期就會移師到北京鳥巢舉行總決賽。
七強爭霸上星期五已經完結，霆鋒一隊嘅「打包安琪」同劉郡格齊齊晉級星期日嘅「鳥巢衝刺夜」七進五嘅比賽。「打包安琪」係第二位選手出場，霆鋒根據佢嘅聲線揀咗孫燕姿嘅《天黑黑》俾佢唱，其實喺前幾場比賽，霆鋒每次對歌曲嘅編排都有新意，今次都唔例外，喺歌曲開始嘅部份選手用鋼琴自彈自唱，另外佢仲喺台上擺咗兩個咪，令選手嘅聲線透過兩種唔同嘅效果出嚟，為導師們同現場觀眾帶嚟唔同嘅聽覺體驗，同時亦展現出霆鋒喺舞台設計方面有一手。
除此之外，霆鋒亦為佢隊中另一位選手劉郡格揀咗首節奏較為輕快TFBOYS嘅《青春修煉手冊》 ，霆鋒亦喺呢首歌嘅編排作出新嘗試，一開始選手同幾個小朋友一齊用杯打節奏，將呢首歌加入用杯打節奏，令人耳目一新，去到歌曲結尾時，佢仲結合結《快樂頌》嘅旋律，呢次係霆鋒繼《尼古拉斯狂想曲》後，再次喺流行曲入面加入貝多芬嘅作品，令觀眾感受到古典音樂同現代音樂融合嘅魅力。
立即下載Apps，隨時隨地睇盡時政專題、深度偵查、娛樂熱話！
按此連結：http://bit.ly/next28app
來源 source: http://nextplus.nextmedia.com
|
鍾意就快D Share啦！
|
|
|