好哋哋出街食晚餐，點解要搞到大打出手呢？周六晚（20日）7點幾，有兩個大男人喺馬鞍山耀安邨一間粥麵快餐店裏面，懷疑因為搭枱問題相嗌唔好口，有人突然情緒激動，除埋件衫露出背脊嘅紋身圖案，嚇鬼之餘仲郁手打人。結果警員到場拉咗一個打人嘅男人，而被打嗰位食客就額頭受傷流晒血，由白車送院。
目擊者黃小姐當時喺粥麵店裏面，佢睇唔過眼有人郁手打人，於是就拍低咗相同片，向《蘋果》爆相爆片。從片段可以見到，當時有個惡男鬧到火紅火綠，粗口橫飛，佢仲除埋件衫赤膊上身，露出背脊全身紋身圖案，其間突然衝前出手打向另一名食客。被打傷嗰位食客硬食一嘢，即場呼救：「有冇人同我報警呀？」
現場惡男嘅一個女親友，即時將佢拉開，但惡男打完人之後仲振振有詞咁話：「我媽咪係你鬧㗎咩？可以亂咁鬧人嘅咩？」有女街坊見咁樣都上前勸交，就話：「阿哥，出嚟食飯啫，唔好咁！」但係惡男就以為郁手打人好啱，繼續話對方：「唔好手指指嘛！」
黃小姐話成件事好似係因為搭枱問題而起，打人嗰個話對方鬧佢阿媽，又手指指向佢媽咪。事發期間食店其他食客都爭相走避，有細路女見到咁嘅場面仲嚇到爆喊，要媽咪帶佢走。而事件中傷者被打到成面血，要由救護車送院。警方到場嘅時候，有警員仲一度手持盾牌戒備。
警方話事件中兩名食客因瑣碎事爭執，66歲姓唐男人額頭受傷送院，而警員就拉咗個30歲姓陳嘅男人，佢涉嫌襲擊他人致造成身體傷害，亦都報稱隻手受傷要送院。
你敢爆，我敢獎！ 立即WhatsApp《蘋果》24小時爆相爆片熱線或致電：63836568
| 躁男火遮眼，女親友出手勸交。(讀者黃小姐提供) | | |
|
鍾意就快D Share啦！
|
|
|