掃呢頁CODE去手機

2018年10月20日 星期六

英超Fever:【不斷更新】半場輸一粒 曼聯仲有冇計? __,曼聯,

(GettyImages)【20:52】大衞雷斯走空晒,接應角球一頂僅柱邊出界【20:42】55分鐘楊格右路一抽,佐真奴一擋,馬迪爾一射入網,曼聯追番 ...


(Getty Images)


【20:52】

大衞雷斯走空晒,接應角球一頂僅柱邊出界

【20:42】

55分鐘楊格右路一抽,佐真奴一擋,馬迪爾一射入網,曼聯追番1:1!

【20:33】

佐真奴中場過咗兩個,靚直線質畀莫拉達,左腳一射過唔到迪基亞

【20:16】【半場完】車路士 1:0 曼聯

寸王帶曼聯返史丹福橋,上半場初段都虎虎生威,成隊波到人到,重點看管夏薩特,形勢同主隊拉成均勢。不過車仔始終進攻瓣數多,一次角球攻勢就搞掂對手。曼聯落後之後冇晒計,畀車仔搓住踢,冇咩威脅過對手大門。半場落後一粒,睇吓換邊後莫連奴有咩計。

【20:01】

曼聯走甩阿朗素,但呢個後衞空晒攞甩腳,紅軍爭啲輸到兩粒!

【19:58】

夏薩特被重點招呼,半粒鐘未夠,馬迪同楊格已因夏神攞黃牌

【19:51】車路士 1:0 曼聯

21分鐘車仔入波喇,普巴走甩魯迪格,畀佢接應角球頭槌頂入,車仔1:0!

【19:40】

車仔夏神禁區頂博到罰球,點知韋利安一腳唔知射咗去邊,嘥料

【19:33】

車路士大戰曼聯,一開波雙方都好主動,曼聯先博得角球,轉個頭到高華錫入禁區起腳,好睇喎!

【19:00】

車路士大戰曼聯陣已出,曼聯阿歷斯山齊士繼續做後備,盧卡古、拉舒福特、安東尼馬迪爾打三箭頭,保羅普巴同尼曼查馬迪中間掃波,一向冇乜機會打正選嘅桑馬達就正選落場打進攻中場。中堅方面,由域陀連迪路夫搭基斯史摩寧,艾歷拜利做後備。車仔方面,當然有夏薩特落場,而艾華路莫拉達就爭贏基奧特正選落場。

車路士正選陣容:

門將:阿列沙巴拿加

後衞:艾斯派古達、大衞雷斯、魯迪格、馬高斯阿朗素

中場:高華錫、佐真奴費路、尼高路簡迪

前鋒:韋利安、艾華路莫拉達、夏薩特

曼聯正選陣容:

門將:迪基亞

後衞:艾舒利楊格、域陀連迪路夫、基斯史摩寧、勞基梳爾

防中:尼曼查馬迪、保羅普巴

攻中:桑馬達

前鋒:拉舒福特、盧卡古、安東尼馬迪爾

經過國際賽周,英超今晚終於返嚟喇,頭場仲要係超強戲碼,由車路士主場大戰曼聯!曼聯今季風雨飄搖,但上輪先落後兩球下,連入三球反勝紐卡素,稍減領隊莫連奴下台嘅壓力,但呢輪要重返史丹福橋,對住如日方中嘅車仔,要贏波甚至保持不敗都唔係易事。

曼聯今仗有陣容不整,好彩仲盧卡古、阿歷斯山齊士同保羅普巴壓陣,車仔則有弗爆夏薩特領軍,無論邊隊贏都好肯定都有一番惡鬥,球迷肯定過足癮。大戰之後有曼城主場對般尼,而近期四戰不勝嘅利物浦,就作客哈特斯菲爾德,想知道今輪英超最快消息,梗係黐實《東網》啦。


來源 source: http://hk.on.cc
鍾意就快D Share啦!