噚日ViuTV喺九展舉行「2019節目發佈會」，陳秀雯、景黛音、盧海鵬同《全民造星》一班參賽者都有出席。現場介紹明年製作嘅劇集同新一季《造星》節目外，ViuTV仲會喺九展開設新錄影廠，方便現場觀眾參與節目拍攝。
廣告客戶勁冧
最近因《造星》人氣急升嘅姜濤，前晚亮相畢書盡演唱會做嘉賓時，已經引到班粉絲狂叫，原來佢好受廣告客戶歡迎。噚日姜濤同其餘《造星》八強，隨住宣傳片播出後上台跳舞，當姜濤做出心心招牌動作時，台下嘅廣告商代表即刻發出歡呼。姜濤除咗會同復出嘅景黛音拍劇集《退休女皇》，仲會同其他《造星》參賽者拍攝劇集《信任的遊戲》。
對於未贏已經有劇在手，姜濤話：「完咗先再諗，多人支持好大壓力，𠵱家平常心，唔好諗一定贏。」佢又話有劇在手，唔代表輸贏可以隨意：「做藝人有危機意識，今日好唔代表聽日好，要充實自己。」ViuTV製作部副總裁金廣誠被問到係咪力捧姜濤，佢答得簡單：「其實我哋都有casting，都要由監製、幕後選出嚟。」
劇集方面仲有南方舞廳新作《婚內情》、改編藍橘子小說嘅科幻愛情劇《假若愛有期限》、反映社會議題嘅校園劇《教束》、號稱係非一般家庭倫理劇《仇老爺爺》、科幻喜劇《Reboot重新啟動》等，當然仲有重頭劇《詭探前傳》。另外，ViuTV仲宣佈奪得明年《第38屆香港電影金像獎》直播權，體育方面就有西甲、世界高爾夫球錦標賽、香港網球公開賽等嘅直播權。
撰文：馮仁昭
|
鍾意就快D Share啦！
|
|
|