熱爆娛樂: 與李若彤相隔23年再續情緣劉青雲露宿者Look曝光 _

2018年11月7日星期三

劉青雲同韋家輝自從電視劇《大時代》之後惺惺相惜，之後兩人轉戰電影圈，都有唔錯成績。印象較深嘅就有近年嘅《神探》，戲入面青雲都係飾演警察。睇嚟韋家輝對青雲做差人情有獨鍾，因為佢最近導演嘅作品《神探大戰》又搵咗青雲演出。

日前就有本報讀者李先生透過本報「爆相爆片」，公開佢喺深圳灣口岸大陸嗰邊，見到青雲喺度為《神探大戰》開工嘅情況。李先生話當時青雲打扮到污糟邋遢，仲要着住厚褸：「青雲件黃色外套又爛又污糟，塊面又有化妝瘀痕，成個流浪漢咁。」佢仲話當時好多人過緊關，見到都停低圍觀拍照，青雲都好大方任影。

估唔到青雲同李若彤自95年嗰套《無味神探》以來，事隔23年有機會再做夫妻。而戲入面同樣飾演警察嘅林峯，會被韋家輝塑做成魔警。《神探大戰》故仔講述一名自封「神探」嘅罪犯，同真嘅神探展開一場七宗罪式嘅鬥智鬥力角力，破案關鍵係要識破兇手嘅動機。

精選娛聞，喺晒《娛果》

http://fb.com/appledailyent

青雲同李若彤時隔23年，再續前緣。（資料圖片）	青雲打扮十足十露宿者。（讀者提供圖片）	 開頭冇人認出青雲。（讀者提供圖片）
 青雲嗰裝扮非常污糟。（讀者提供圖片）	 過關客後來認得青雲，即刻舉機猛影。（讀者提供圖片）	 李若彤當年同青雲一齊拍《無味神探》。（劇照）