救護員雖然係救人，但有時都會面對生命危險，例如雄姐死咗啦、在哥又被人點相尋仇啦。
至於羅天宇都唔好得去邊，佢架車俾人用磚頭掟凹咗，搞到成車都係玻璃碎，好彩個人無事。唔好誤會，唔係講緊拍劇劇情呀，羅天宇堅係舐咗嘢！佢自己都承認：「一個膠袋入面裝住石頭、磚咁樣，好彩人無事。」
是咁的，據讀者報料指，昨晚（11月6日）大約7點左右，途經清水灣道彩雲村，突然聽到「嘭」一聲好大聲，原來泊喺路邊嘅車被高空擲物擊中，車頂即時凹陷、玻璃碎裂。幾分鐘之後車主出現，原來就係羅天宇。
據知當時羅天宇打算攞車走人，見到現場情況後都呆一呆唔知發生咩事，幾分鐘後先識得反應過來Call 999。又難怪佢會發呆呀，因為如果早幾分鐘嚟到攞車，到時就唔係車毀咁簡單，隨時人亡添架！
事後羅天宇留喺現場清理，先去文具店買咗卷大膠紙，用嚟「印」走散落喺車廂入面嘅玻璃碎。讀者話原來都幾多玻璃碎片，因為羅天宇都「印」咗個幾兩個鐘。自己當殃，羅天宇亦唔想搞到其他人例如清潔工，所以佢又去附近垃圾房執個喼嚟裝玻璃，最後加埋落口供，前後足足搞咗4粒鐘。
究竟係無妄之災，抑或係有人故意咁做？《壹》仔致電羅天宇查詢，佢話：「一個膠袋入面裝住石頭、磚咁樣，好彩人無事，主要係車頂爆咗。我架車上面有個屋苑平台，應該係嗰度掟落嚟，但詳細都唔知，因為嗰度無閉路電視，都係答住咁多先啦，因為唔係咁方便。」
其實彩雲村有高空擲物已經唔係新鮮事，今年較早前都有報導指彩雲村現擲物狂徒連毀6車，街坊仲話垃圾、西瓜甚至凳都有掟過落嚟，就算通知管理處同報警都做唔到嘢。
來源 source: http://nextplus.nextmedia.com
|
鍾意就快D Share啦！
|
|
|
