87年港姐出身的張鳳妮，拍過多部劇集，但在97年她毅然離開娛樂圈，翌年嫁給富商老公傅仰峰，到馬來西亞做少奶奶。張鳳妮日前接受《蘋果》專訪，她直言當初做過埠新娘時，生活「悶到嘔」，靠租錄影帶看劇集打發時間。後來，她先後誕下三位千金，苦悶的少奶生活終看到曙光。
採訪：戴彩煥
攝影：沈健程
現年52歲的張鳳妮（鳳梨），在87年就以19歲之齡參選港姐，雖然最後落選，但之後在無綫拍過多部劇集，包括《他來自江湖》、《餐餐有宋家》及《天地男兒》等。97年她離開娛樂圈，翌年嫁到馬來西亞做少奶奶，先後為富商老公傅仰峰生下三位千金，長女Emily已經18歲，次女Ashleigh和孺女Ally亦分別17及13歲。女兒長大，鳳梨亦開始樂得清閒，上個月她專程返港出席無綫前金牌監製潘嘉德70大壽，順道去欣賞好友劉玉翠和關寶慧的舞台劇。
移居大馬多年的鳳梨日前在港接受《蘋果》訪問，一到場她主動澄清真實年齡：「你哋寫細咗我兩年，其實我52㗎喇。」即使年過五十，但對真實年齡也毫不顧忌，更說了一句：「千祈唔好幫我執相喎，我好怕㗎。」自言不勤做運動、不愛節食的鳳梨，對於保養，她亦有一套妙法，就是心境：「打吓麻雀，個人冇乜要求，你會覺得心境開朗啲，冇乜大壓力，人都會老得冇咁快。」
| | |
租帶打發時間
鳳梨轉眼間已嫁到大馬20年，她坦言初時生活難以適應，更以「悶到嘔」來形容，皆因當地只有兩個中文電視台，租劇集錄影帶也成為了樂趣：「好悶、好悶，所以咁快有細路仔，有咗細路仔，出邊世界係點你都唔會理。」在他人眼中，鳳梨是少奶奶，但她卻笑說自己是家庭主婦，由過往看時裝書，到現在一屋烹飪書，最初想簡單煮給女兒吃，到現在越煮越好玩。
回想鳳梨87年選港姐的日子，那屆首次到布吉出外景，首次以超性感比堅尼示人，相當突破：「我哋個個睇到啲泳衣都『吓？』初初有少少抗拒，出嚟都唔係好自在……不過好玩嘅，冇試過咁多女人一齊坐飛機，大家成日喺房傾偈食嘢，人生一個好好嘅回憶。」
感激萬子帶戲
落選後，鳳梨加入無綫，拍過《他來自江湖》、《同居三人組》及《天地男兒》等劇集。在《他》劇中，鳳梨飾演「弗得妹」阿娟，她被萬梓良扯住頭髮推入浴室淋花灑教訓一幕，至今仍是經典，但原來當初鳳梨看到劇本時，也覺得害怕：「我冇諗到可以去到咁盡，正式roll機時，佢真係兜頭兜面個花灑淋落嚟，咁反而幫到我，變咗你會掙扎多啲，個戲咪出到嚟。呢場戲我多謝佢，如果唔係佢，你哋唔會記到𠵱家。」
雖然鳳梨做過女主角，但始終未能大紅大紫，演藝生涯一直都是平平穩穩：「因為我冇乜野心，佢哋（無綫）擺我邊我都做，做呢行唔可以hea住嚟做，你畀我做，我做到最好，希望你可以睇到，變咗你會畀更好嘅嘢我。而且最終我想做嘅係阿媽、老婆，我志願係做個好媽媽。」
拒絕復出拍劇
鳳梨96年離開無綫時，屬包薪藝員，她說：「包薪藝員係親生仔女，當年畀好多機會，可能我自己唔夠好啦，當時好多人去咗台灣同馬來西亞拍嘢，我一個月兩萬八千，人哋去到嗰度（馬來西亞）有8萬一個劇，喺TVB仲要抽佣。」公司後來着她改簽部頭：「要一個個劇計，唔包你薪可能萬幾蚊一個月，我唔係好甘心，我唔想36歲都仲係咁。」鳳梨之後選擇到大馬拍劇，亦因而認識老公，最後息影結婚，亦願望成真成為媽媽。最近不少80年代藝人，包括景黛音和李婉華等，相繼復出拍劇，卻打動不到鳳梨：「我哋呢啲五十幾歲，06、28（早上6時開工，凌晨4時收工）真係唔得，死得人㗎，玩吓幾集就OK嘅，如果啲對手我鍾意嘅話。」
場地提供：Harlan's（The ONE）
|
鍾意就快D Share啦！
|
|
|
