近年進軍美容界的女強人胡曦文（Christy、前名胡敏珊）事業、愛情兩得意，在美容界發展短短兩年，成績卓越，感情路上她亦覓得如意郎君，揚言隨時閃婚！
前晚Christy穿上紅色低胸晚裝裙，盛裝出席國際美容健康總聯合會IBHGU舉行的「IBH第四屆就職典禮暨亞洲國際美容健康品牌節」，席上她獲頒「亞洲美容健康最具影響力品牌大獎」。對於入行僅兩年已獲得認同，她表示很榮幸：「呢個會好好，可以將我識嘅嘢同人分享，做老師教學生新科技，我依家編排緊時間教， 都做咗好多資料搜集。」問到何以對美容有興趣？原來她希望身邊朋友都靚：「好多朋友都話我皮膚幾好，成日都會問，所以諗不如做美容，除咗自己靚，大家都靚咁先開心。」
聖誕拍拖遊埃及
Christy除了美容還有做金融，主力做融資及收購。問到聖誕節會否在港？她透露將去埃及睇金字塔。問是否有男友同行？她大方承認蜜運中：「都拍咗一段時間。（邊類型？）我嘅類型，佢好好，我好滿意。（隨時閃婚？）都可能，要睇幾時行雷，都會想有個家庭。（計劃下年結婚？）睇吓個雷行得幾大，如果大就快啲。（男友求婚未？）所以話未行雷。」
謝芷倫極速落妝
同場的無綫藝人謝芷倫以「健康美容大使」身份現身，透露與Christy十分老友，經常交流護膚心得：「我哋拍戲成日捱夜，好難早瞓，所以要做多啲運動，食中藥調理。我唔想皮膚化妝太耐，有時一拍完戲就會喺公司落妝，返屋企再徹底清潔，保濕好重要。」忙於拍攝《法證先鋒IV》的她，聖誕將留港賺外快，已接了多個登台工作。
今次活動，國際美容健康總聯合會創會會長彭玉玲與慈善團體「仁美清叙」主席程瑤合作，還邀請了多位藝人包括黃致豪（前名黃長興）、陸詩韻、莊端兒、黃竣鋒（前名黃集鋒）、馮雪冰及楊光化身模特兒，在晚宴中行慈善時裝騷，最終為「仁美清叙」籌得近6位數善款。
沈德寶莉半退休歎世界
久未露面的名媛沈德寶莉（Deborah），前晚偕丈夫Keith現身，從事美容多年的她透露現已半退休：「我之前間公司有大股東入資，依家我只係做顧問，成日同老公周圍遊玩，要好好享受人生。（咁你對仔女呢？）佢哋都大個阿女都30歲喇！依家喺澳洲做嘢，阿仔就做律師。（阿女結婚未？）未，呢個年代唔使咁快。」
同場有份行慈善時裝騷的黃致豪透露，已有10年冇行天橋，有少少緊張：「雖然我唔係好高，但都好鍾意做Model。」問到鍾意演戲還是行騷？他認為各有不同：「我會揀演戲，因為可以長久啲。（特登節食？）我呢期都食少咗，要保持身形。」此外，見他面上有兩條小疤痕，原來是被同睡的囝囝指甲刮到：「尋日見到佢指甲好長，但未得閒剪，點知起身塊面多咗兩條痕，好彩唔係好深！」
|
鍾意就快D Share啦！
|
|
|
