同片頭預告嘅一樣，《跳躍》死嘅真係雄姐（張彥博飾）。
日前播到雄姐殉職時，好多觀眾都話喊到收唔到聲。唔知大家有無同感，雄姐死會令人淚崩，唔係因為嗰幕情節好刻骨震撼，而係因為張彥博令到個角色夠討好。
講真，雄姐死得好兒戲，捉實窗花移動咪無事囉，話晒地板仲有好多位，又有足夠窗花可以借力，但偏偏要勉強自己跨過個窿，搞到失足跌死，仲要只係唐二樓嘅高度。
明白劇情安排雄姐死，係想令卓家傑內疚、自責，利用死嚟突出主角條線，不過起碼都安排個似樣啲嘅事故經過吖，例如傑仔遇險或做錯事，令雄姐為救兄弟犧牲自己。唔係喎，只係因為傑仔同雄姐提出換位企，然後唔好彩死咗就要自責，未免太小兒科喇。呢種劇情安排，簡直浪費咗雄姐呢個角色，死得好唔值。
所以，觀眾為雄姐流淚，唔係因為劇情，而係因為張彥博飾演得好，將角色乸乸地、溫柔又細心嘅平易近人，演得恰到好處，如果唔係又點會被網民盛讚佢拿捏得啱啱好呢？
來源 source: http://nextplus.nextmedia.com
|
鍾意就快D Share啦！
|
|
|
