【娛樂人物】
溫婉嫻淑的鮑起靜，為愛情可以義無反顧。17歲的她與方平在電影訓練班認識，當年方平英俊又風流，女友逾百個，兩人談婚論嫁時，她不理身邊反對聲音，堅守愛情︰「我好愛佢！就算十年後分開都不枉此生。」近40年婚姻經歷不少風雨，82年誕下女兒後經濟拮据，鮑姐為幫忙養家曾忍痛打掉孩子。鮑姐處處老公行先，真愛將方平徹底融化。
撰文︰祖李
攝影︰周樂恒
鮑起靜與方平不是一見鍾情，是認識十多年後才結婚的。兩人當年在「長鳳新電影訓練班」認識，因為鮑姐年長兩歲，他們就成了「姊弟」。其間方平不避嫌帶女朋友見鮑姐，不過千揀萬揀，還是揀了「愛他甚於自己」的鮑姐做妻子。
| | |
為份工落仔
70年代初，方平與鮑姐在電影中經常演兄妹，直至1980年拍《白髮魔女傳》演情侶。鮑姐日前在尖沙嘴接受訪問時，坦言在戲中愛上方平，今年70歲的鮑姐回憶兩人初次見面依然甜絲絲︰「佢當年太靚仔，好多女朋友㗎，我都見過二十幾個，個個係靚女，但佢對我好好，喺片場請我食燕窩。如果我哋一嚟就拍拖反而唔會長，因為識咗十幾年，佢覺得我最啱佢。當年結婚，好多長輩都勸我唔好貪靚仔，當時有擔心、猶豫，但我好愛佢，就算十年後分開都不枉此生吖。」
當年鮑姐爸爸鮑方也提醒女兒︰「方平不是不好，就是女人緣太旺。」鮑姐也認同丈夫口花花冧死女，但也很有分寸及顧家︰「佢𠵱家都好鍾意𠱁女仔開心，不過佢好顧家，拍拖嗰陣已經識理財，為將來計劃，有咗佢就有依靠，令我無後顧之憂。」
結婚不久，女兒出生，鮑姐和方平同時與電影公司解約，經濟拮据，她轉投麗的（亞視前身）拍電視劇，由花旦降格甘草，但薪酬比電影公司多三倍，由三千多元加到萬多元，所以為了工作，當時發現懷孕也要忍痛打掉。她皺着眉憶述︰「好幸運老爺奶奶比老公更好，佢哋雖然係潮州人，但好開通，生完囡囡後都曾經再懷孕，但當時啱啱轉拍電視劇，經濟壓力大，份工緊要，最後都冇要個BB。我奶奶仲安慰我︰『一個女好好照顧就夠。』」
| | | |
電話緝老公
與丈夫經常分隔兩地，方平是製片又是導演，難免有女人埋身，不過鮑姐有撒手鐧︰「打電話係必不可少，直到今日，我一返家唔見佢，就打電話問佢喺邊，知佢喺邊就安心，唔係唔信任，但我成日同佢講，如果有乜嘢，你千祈唔好畀我知，講笑，so far咁多年都幾好，佢好安份。」方平是潮州怒漢，大男人脾氣，但也有死穴，就是極度貪靚，鮑姐爆老公每天做一百下sit up，風雨不改。每當老公發脾氣，她就出絕招︰「我會話︰『爹哋！你一發嬲鬧人就唔靚仔！』佢就即刻收火。」
場地提供︰The Luxe Manor @ Dada Bar+Lounge
|
鍾意就快D Share啦！
|
|
|
