無綫小花江嘉敏（Kaman）近年備受公司力捧，在新劇《兄弟》中首度擔正女主角。拍攝期間，她與拍檔王浩信傳緋聞，Kaman自爆當時為避嫌而未有理睬對方兩天，幸得好姊妹劉穎鏇出手化解尷尬。現有正印男友的Kaman大讚對方十分理解其工作，不會干涉她拍親熱戲。
Kaman在劇中飾演女保鏢，她笑言今次是優差一份，沒有任何打戲及開槍鏡頭﹕「我見其他演員打得好開心，我都想打，開劇之前我好期待，有問監製我需唔需要上拳擊堂，佢話你個角色唔使打，應該要揸槍，仲話會寫多啲揸槍場面畀我，我喺屋企苦練揸槍姿勢，但最後係一場揸槍戲都冇。後來我同監製講你呃我，佢話開《姊妹》嘅時後補番畀我。」
爆緋聞唔睬王浩信
Kaman首次做女一，加上對手是視帝王浩信，已令她緊張不已：「我有同監製傾點去演，我個人比較百厭調皮又多嘢講，佢叫我要成熟啲、唔好咁小朋友，所以開頭一星期我好靜，佢有唔慣，仲問我係咪唔開心。」怎料拍攝沒多久，Kaman與浩信便傳緋聞，更令她壓力爆燈：「我拍劇經驗唔多，傳緋聞係第一次，真係唔識點去處理，當時我哋喺英國拍緊劇，初時我有啲尷尬，我怕大家一齊傾劇本，會畀人繼續寫，我有兩日冇睬過佢，不過監製同Tiffany（劉穎鏇）覺得我唔可以因為緋聞而影響表現，咁係唔專業，係Tiffany拖住我過去同浩信打呼招打破隔閡，我覺得佢哋講得好啱，如果因為咁小事而影響自己表現同團隊，對大家好唔公平。」
Kaman與浩信在劇中飾演情侶，兩人是歡喜冤家，但親密戲欠奉，問到最難忘一幕，她笑謂：「我比較貪食，體重有番咁上下，一直以來都冇男對手可以成功一吓就抱起我，其中有幕係我暈低咗，浩信係第一個可以公主抱起我嘅男仔。」最近承認拍拖的Kaman問到拍親熱戲之前是否要向男友備案？她直言：「我有同佢講過，問佢拍呢類戲ok唔ok，佢話呢個係你工作，佢好明白，會支持我嘅工作，佢唔會因為自己個人喜好而去控制同決定我要做啲乜。」
兩年後想攞獎
Kaman對今次角色期望甚殷，希望憑此角令事業再上一層樓，講到目標，她謂上年的目標是兩年內令全港市民都識得她：「我依家都係繼續向呢個目標前進，如果兩年後可以攞獎就最好。」至於最想挑戰的角色，愛說過不停的她反高潮地說：「我想做啞巴，個個都話我好多嘢講、好嘈，我要畀佢哋知，我真係可以唔講嘢，而且唔講嘢可以用力收下巴，佢哋成日話我肥。」
化妝﹕Namnam Lam
髮型﹕Haffman Cheng
服裝﹕Wardrobista
場地﹕1963木十豆寸
|
鍾意就快D Share啦！
|
|
|