家陣嘅小學生測驗多，功課仲多，有時要犧牲瞓覺嘅時間先至做得晒，張新悅話完全唔容許呢個情況係屋企出現。
「我成日同佢哋講，夠鐘瞓覺喇，唔准做功課，佢話唔得㗎，聽日無功課交，我會話唔緊要啦，瞓覺重要啲。其實我係一個注重健康同品德嘅人多啲!我覺得如果佢因為做功課夜瞓，搞到第二日返唔到學咪仲衰，所以我覺得應該要有人情味，我唔係整緊一部機器。我希望自己小朋友首先要健康，我覺得人一定要健康，我要健康佢哋都要健康；其次係好有求知慾，好希望學習，呢樣嘢我覺得一生受用。」
家有4條queen，屋企又有外傭姐姐幫手，但係我哋成日影到嘅竟然係呢個畫面。
「我覺得呢個係一個媽媽嘅責任，事實上如果假手於人嘅時候，每一刻都會擔心佢會唔會著涼呢？過馬路會唔會有危險呢？究竟有冇得到足夠照顧呢？自己成日都會心掛掛，既然心掛掛，當然係親力親為啦，同埋當然呢十年自己都唔需要工作，一個唔需要工作嘅女人，又生咗小朋友，唔係自己照顧，咁搵邊個去照顧呢？」
「我成日同自己講，我係一個媽咪，我要做好媽咪本份，佢哋所有嘢我都會盡量配合。有啲媽咪真係好盡責，每日返學放學都親自接送，我反而唔係咁樣，因為我鍾意佢哋搭校車，有佢哋嘅世界。有時掉番轉咁講，我出街係為咗等佢哋有獨立嘅時間，因為日日咁樣坐喺度望住佢哋，佢哋又唔會珍惜媽媽，乜嘢都依靠我，我會盡量出去，反而係俾啲空間佢哋。另外，當我帶佢哋出街嘅時候，就好似上星期日，我帶晒四個小朋友出街，其實完全無人幫手，當出現呢個情況嘅時候，我嘅女分別九歲、八歲、四歲，睇到四歲嗰個都開始成熟，見到媽媽抱住BB，BB又喺度喊，嗰種情況佢哋會識得照顧自己，唔會做一啲嘢去令我更加辛苦，我見到佢哋咁錫媽媽首先會好開心，第二就係大家都話希望小朋友學識獨立，我覺得每日以行動去教識佢哋獨立。」
正因爲全天候緊貼囡囡嘅成長，所以張新悅留意到傳統學校唔適合二女Lily，係今個學年開始幫佢轉讀提供華德福教育嘅happy school。
「我發覺大家姐同二家姐性格都好唔同，真係一個東一個西，一個左一個右，當佢哋唔一樣嘅時候，我亦都觀察咗好耐，要用唔同方式去教同一樣嘅嘢，所以發現其中一個適合香港傳統教育，另一個掉番轉係會令佢更加唔鍾意，或者係學唔到嘢，令佢心靈上都有壞影響，如果繼續咁樣嘅話，所以既然係咁，我覺得當然要搵一間合適佢嘅學校。自己都諗咗好耐，係咪應該要分開佢哋呢？因為喺一個媽咪立場，分開佢哋有個問題，就係會唔記得佢哋幾時放假，幾時返學，校車又搞到亂晒，同埋運動日都會有幾次，家長日又有幾日，呢方面就多咗工夫，但我希望搵到個合適嘅學校俾佢哋學習。」
囡囡讀開嘅傳統學校，喺唔少家長嘅心儀目標，作出轉校有呢個決定，屋企人有冇好大意見呢?
「我諗小朋友喺邊度讀書，最主要一定係我同丈夫嘅決定，我哋兩個喺呢方面其實都好一致，如果你話有任何壓力，可能只係一啲最親嘅親人，唔係街外嘅人，佢哋對我無乜影響。如果最親嘅人，例如老人家就會問點解要轉校，本身學校咁好，一定會有咁嘅諗法，但係我哋屋企嘅老人家又好明白事理，解釋俾佢哋聽，佢哋就會話即管試吓啦，不過會掉番轉提醒我哋，有冇第二步計劃，如果又行唔通咁點算？或者會叫我哋要小心啲，唔好令到家姐細妹唔開心，你知小朋友乜嘢都爭一餐，轉校都要爭，會咁樣提點我哋囉!」
立即下載Apps，隨時隨地睇盡時政專題、深度偵查、娛樂熱話！
按此連結：http://bit.ly/next28app
來源 source: http://nextplus.nextmedia.com
|
鍾意就快D Share啦！
|
|
|
