掃呢頁CODE去手機

2018年11月29日 星期四

歐聯:尼馬球王級!利物浦兵敗PSG瀕臨出局 __,尼馬,

(法新社圖片)用心、專心踢波嘅尼馬的確係球王級,利物浦即刻變炮灰!歐聯「死亡C組」超級大戰,巴黎聖日耳門主場對利物浦非勝不可,尼馬盡展大佬風範,又跑又 ...


(法新社圖片)


用心、專心踢波嘅尼馬的確係球王級,利物浦即刻變炮灰!歐聯「死亡C組」超級大戰,巴黎聖日耳門主場對利物浦非勝不可,尼馬盡展大佬風範,又跑又撲不斷策動攻勢,上半場先策劃第一個入球,跟手自己亦取得士哥。雖然紅軍完半場上扳回一城,但換邊後受制於對手防守,一次中龍射門都冇,最後主隊贏2:1,取得極其關鍵3分!

今仗賽前PSG僅得5分,如果輸波而拿玻里又擊敗紅星的話,就會提早出局。尼馬一向於場上玩世不恭,但去到生死大戰即刻唔同晒,一開波就帶領球隊瘋狂進襲對手,6分鐘迪馬利亞禁區外左腳窩利,紅軍門將艾利臣比加飛身撲出。12分鐘尼馬引球交予麥巴比禁區外一射,被艾利臣接實。13分鐘主隊開紀錄,尼馬於中場快速推進,交予麥巴比於左路傳中,華基爾雲迪積克閂橫,祖安巴尼特一攞右腳一射入網。

落後一粒嘅利物浦,之後攞番啲攻勢,22分鐘占士米拿右路一撳,沙拿禁區內左腳射近柱卻唔中龍,2分鐘後主隊華拉堤鞋底踩中祖高美斯上下五吋,球證僅畀黃牌。主隊之後再度發動猛烈攻勢,麥巴比左路地波一出,卡雲尼趕到,好彩路夫蘭快一步解圍。37分鐘尼馬嚟料,於中場同麥巴比嚟個ONE TWO,跟手送麥巴比一程落底線傳中,卡雲尼一射被艾利臣擋出,但尼馬趕到補射入網。完半場前沙迪奧文尼突入禁區,迪馬利亞鏟跌文尼,占士米拿射12碼入網,半場主隊領先2:1。

主隊換邊後爭啲拉開比數,馬昆奴斯哥利亞接應罰球送咗個波入網,可惜越位在先入球唔算。之後利物浦不斷壓前搶攻,60分鐘安德魯羅拔臣左路出波,羅拔圖法明奴一頂唔中龍。利物浦跟手先後換入拿比基達、史杜列治同梳頓沙基利,不過PSG屯重兵於後防,紅軍連射中龍嘅機會都冇,完場前尼馬主射罰球又畀艾利臣救到,但無阻PSG贏2:1,取得歐聯重要勝仗,而紅軍就陷入出局邊緣。

支持本地運動員,一齊去「睇體」!

https://bit.ly/2DxX4XI 

東網體育FB同你追實體壇每個精彩時刻!

http://bit.ly/2ecTF2A 


來源 source: http://hk.on.cc
鍾意就快D Share啦!