農夫演唱會一般都會以送客環節作為結尾。不過，日前一場show佢哋改以棟篤笑形式進行，皆因二人嘅同行──黃子華係座上客。
點解突然以棟篤笑形式作結？農夫話：「作為同行，我覺得要有個作品俾你（黃子華）睇吓！雖然今日做得麻麻，唔好意思。多謝，真正亦師亦友嘅子華神。」
黃子華聞言立即上前同二人擁抱，隨後仲拎起咪講兩句，隨便兩句都講得相當有趣：「真係唔好講出去，我唔係復出呀吓！佢（農夫）話嗰晚同佢講咗好多個鐘頭嘢呢，其實我哋係講過地球嘅環境問題、AI將來會點樣滅殺人類。我哋講過好大好大嘅問題，而佢哋只係記得我叫佢哋唔好講粗口。」
農夫解釋：「度嘢係咁架啦，好多假架嘛。你嗰啲阿強唔通全部真嘅？鳳爪壽司我唔信有啦。」
黃子華：「我係真係記我叫你唔好講粗口嘅，但係大家睇唔睇到係幾咁困難嘅事呀？我係真係認為佢哋係我同行，所以如果佢哋再做棟篤笑，如果佢哋好認真咁做 」子華講到呢度停一停，農夫立即認真mode一副受寵若驚樣，而現場觀眾就興一興奮嗌幾嗌，然後聽到5個字，最後得啖笑。「我盡量在場。」子華說。
來源 source: http://nextplus.nextmedia.com
|
鍾意就快D Share啦！
|
|
|