內房股不濟四出撲水，又發債又回購；不過中環班金融八卦佬焦點始終落喺恒大地產（3333）身上；打賭到底 「一代梟雄」大劉還是「紅色大鱷」許家印先至係高手呢？
三年前，當樓市愈升愈有之際，一幢幢嘅港島區商廈成為紅色資本家嘅搶手貨；爭相買入用來掛招牌插旗。其中華置（127）最狠，將旗下灣仔美國萬通大廈全幢以125億元出售予恒大，創當時商廈成交價紀錄。大廈已改名為「中國恒大中心」。不過呢單交易喺以分期付款形式支付，華置收咗四成訂金即係50億元後，恒大再攤分六年俾錢；每年俾12.5億元，恒大孭住過萬億債都好吃力，近排都頻頻伸手發債抽水，並以高達11%高息吸客；所以地產佬及金融老都擔定櫈仔睇戲，會否有朝一日恒大無力俾埋尾數完成呢單交易，咁成幢物業就「完璧歸趙」！
其實大劉喺有前科，1985年2月股市風高浪急 ，大劉把手頭嘅愛美高股份以每股2.04元拋售予一班基金佬，連主席都唔做，由大劉嘅風扇廠舊拍檔梁英偉頂上，半年之後，愛美高股價從高位跌到四腳朝天，大劉遂出手以每股0.7元大力吸納愛美高股份，攞番34%控股權，此乃大劉本色也！正所謂前車可鑑，恒大中心會否完璧歸趙落番大劉手上，且看恒大呢一個浪能否過骨！
來源 source: http://nextplus.nextmedia.com
|
鍾意就快D Share啦！
|
|
|