59歲毛舜筠人生步向黃昏，但生命卻越活越精彩，去年成為了藍帶廚師，今年憑《黃金花》奪金像影后，上星期榮升老闆娘在灣仔開設曲奇餅店，這間餅店是她和美指老公區丁平（Tony）的心血結晶。
區丁平是毛姐的第三任老公，毛姐的感情世界經歷過滄海桑田，17歲花樣年華的她跟張國榮（哥哥）有一段puppy love，當年20歲的哥哥向毛姐求婚被拒；毛姐於21歲嫁給首任老公文舒揚，婚姻維持3年；29歲嫁給第二任老公蔣家駿，婚姻維持5年；35歲跟區丁平閃婚，其實兩人相識多年，原來幸福早已在身邊！
日前毛姐在灣仔接受《蘋果》專訪，談到一直有傳當年是哥哥介紹兩人認識，毛姐好氣又好笑：「梗係唔係啦，其實呢個謠傳傳咗幾十年，我真係好嬲，不過我懶得去澄清，嚴格嚟講，穿紅線嘅人係梁太（梁李少霞），但佢又唔係介紹人，因為我哋識咗好耐，大班朋友成日去梁太屋企聚會，我哋根本唔需要人介紹，已經識咗幾十年，喺同一張枱食飯唔知幾多次，只不過係梁太見到我哋都single，曾經約我哋食飯，就係咁之嘛，食吓食吓就開始拍拖，同哥哥完全無關，哥哥只不過喺我結婚時有出現，同埋佢知我同Tony拍拖時，佢話：『正喎！』就係咁唧，戥我哋開心。」
愛情可以改變一個女人，曾經十指不沾陽春水的毛姐，為了區丁平甘心做「煮」婦。「因為我以前成日都拍戲，人哋問我識唔識煮嘢，因為我唔識，但話畀人聽唔識好似好低威，所以我話：『我做大事㗎，哈哈！』而同Tony結婚之後，佢唔鍾意出街食飯，佢要食住家飯，但我唔識煮，咁點算呢，問老友梁李少霞，佢煮得好好，佢每日教我一個餸，教教吓將《方太與我》送晒畀我，自己一日煮兩個餸，一路加落去，到o依家入廚24年，如果唔使開工，每餐都係我煮。」
結婚24年，毛姐和老公的感情如細水長流：「o依家升華到唔同level，好似兩嚿好多棱角嘅石，經過24年磨合，完全了解同適應，好似睡衣同拖鞋咁，好舒服，好知道佢性格係點，如果明知道會辣着就唔講，佢最鍾意食，所以成日都整嘢畀佢食。」
愛上烹飪後，毛姐發覺煮餸跟做戲的滿足感很相似：「不斷聽到有人話我知：『《家有喜事》睇咗幾十次，好鍾意，連對白都完全識背。』我好開心，煮餸一樣，當你煮出嚟之後，見到食嘅人鍾意，某程度上滿足感仲大過做戲，因為做戲只係扮演一個角色，有其他人分工合作，但煮餸由買料到煮，所有嘢全部都係我一個人做。見到鍾意嘅人、屋企人、朋友食得開心，好enjoy！」
入行40幾年，毛姐由電視台拍劇捱起，今年才首嘗影后滋味，其間歷盡辛酸：「其實電視台嘅日子都辛苦同難捱，晨昏顛倒，好多角色唔到你揀，有啲角色唔係好想做，譬如性格唔連貫，夾硬做，電視劇慘在有幾個導演，甚至乎有好多個編劇，拍攝時間好長，瞓都唔夠，唔好話再去研究點解角色唔連貫，亦好難搵邊一個去傾，好多時出現呢啲問題，所以係難嘅，不過，亦可以咁講，因為經歷咗40幾年演藝生涯，冇乜嘢係我未見過。」
撰文：余燕儀
攝影：沈健程
攝錄：廖達燊、葉君海
場地：Mustard Seed Co-working space
精選娛聞，喺晒《娛果》
http://fb.com/appledailyent
| 哥哥是毛姐的初戀，區丁平是她的最愛。（攝影：沈健程） | | |
| | | |
|
鍾意就快D Share啦！
|
|
|