廿年冇拍大台劇嘅張衛健，終於返嚟！
餓咗香港觀眾咁耐，大帥哥一出，好多網友評語都大讚。
觀眾睇得爽，但同佢對做對手嘅，卻係一額汗！張衛健轉數快，《大帥哥》一班後輩對手，起初好有壓力。
「好老實講，喺開工之前，除咗曹永廉我係識之外，其實每一位我都唔識，未合作過，我睇過徐榮嘅處境劇，未見過洪永城嘅戲，未見過蔡思貝嘅戲，仲有「劈榴槤」李嘉我都未睇過。
對於每一位演員，對我嚟講完全係白紙，劇本描寫、設計你哋嘅角色係點樣，到現場我同導演、監製傾，如何去塑造大家嘅角色時，純粹係為咗個角色。
後來佢哋話俾我聽，『其實呢大帥哥，啱啱開工嘅時候，我哋好大壓力，每一個人對住你演戲都好大壓力。』我覺得好奇怪，點解會有大壓力呢？佢哋又講唔出壓力何在，我話俾佢哋聽，呢個諗法係錯到不得了，唔係因為我已經有咗咁多年經驗，而家話俾你聽，對住一位經驗豐富嘅演員演戲有壓力係好錯。
我可以話俾你聽，我同你哋仲係新人嘅時候，會諗: 如果有機會同周潤發做戲就好喇，我一啲都唔會緊張，反而腎上腺素會更加飆升，更加有能量，更加諗到更多古靈精怪嘢！如果嗰場戲我可以做贏發哥，我諗發哥都唔會鬧我；如果我做得贏發哥，我諗發哥會攬住我嚟錫；如果嗰場戲我同發哥睇齊，發哥會大讚我囉！如果嗰場戲我輸俾發哥，佢會教我囉，佢唔教我我都會問佢，所以就算我二十歲出頭嘅時候，做緊配角嘅時候，我已經係咁諗，對住任何人我都唔驚，都未驚過，所以你驚、有壓力點樣演戲、表演。一個歌手好驚、好大壓力、好大負擔，行出去點樣揮瀟自如？演員亦一樣，好大壓力綁手綁腳嘅話，如何揮瀟自如？」
高人在前， 一班年輕對手可以偷到幾多師，就要睇佢哋天資。
「我唔識得教人，亦都未必有資格教人，我只希望你哋好似一嚿吸水棉花咁樣，自己嚟吸喺我身上有咩值得吸嘅你就吸啦，啲毒素你哋就唔好吸喇，我一定會有缺點，毒素唔好要，你哋見到我有咩好嘢就自己去吸收。」
來源 source: http://nextplus.nextmedia.com
|
鍾意就快D Share啦！
|
|
|