【爆相爆片】今年因電視劇上位的陳家樂，近日與陳瀅合作拍劇集《廉政行動2019》，想不到短短四個月兩人已培養出真感情。有讀者透過「爆相爆片」直擊兩人在中環撐枱腳，陳家樂向陳瀅餵食，飯後陳瀅更驅車將陳家樂送到她香閨所在。昨日兩人出席活動時，像夾口供否認戀情，不過陳瀅大數其優點說：「陳家樂抵讚！」似為戀情留後路。
相關新聞：【蘋聞重溫】分手後仍密密約猷亨
現年32歲的陳家樂在6月與拍拖近4年的余香凝分手，面對傳媒採訪時更傷心落淚。陳家樂近日與現年29歲的陳瀅在《廉政行動2019》飾演男女主角，原來陳家樂已放下情傷，與「宅男女神」陳瀅撻着。讀者王小姐向《蘋果》「爆相爆片」，表示上周六約晚上7時，在中環一間日本餐廳遇見陳瀅及陳家樂撐枱腳。
王小姐說：「陳家樂嚟到坐咗入面，陳瀅之後到就坐外面，佢哋叫咗好多嘢食，傾得好投契。」陳家樂更有幫手燒食物，他們共用一碟醬油，見家樂將魚生遞向陳瀅嘴邊，陳瀅亦有低下頭，隱約聽見她笑了幾聲，但最後未有放入口，家樂只好自己食。雖然餵食失敗，但家樂全程跟陳瀅有講有笑，兩人不時咬耳仔，十足似蜜運中的情侶。
| | | |
前後腳走人
大約8時，兩人埋單離開。此時《蘋果》記者趕至，發現陳瀅先行步出，陳家樂則落後幾個身位，兩人有默契地裝作不相識，刻意保持距離未有交談，表現得十分避忌。兩人到停車場後，陳家樂急步登上陳瀅的跑車，陳瀅隨後將跑車駛至停車場出口，停低足足20秒都不開車，似是確認有否傳媒追訪，當她想再開車時，再停多10秒看清楚路面情況才出車，非常謹慎。
陳瀅之後踩行油，孖陳家樂返回位於尖沙嘴的香閨，記者守候至凌晨12時，都沒見到陳家樂離開。差不多同一時間，陳瀅就更新Ig Story，上載了一位女性朋友食水煙的片段，清楚見到她們的位置面向對面海的ifc，似乎陳瀅有心聲東擊西。
相關新聞：【蘋聞重溫】曾許諾照顧余香凝一世
「似兩兄妹」
陳瀅及陳家樂昨日分別出席公開活動，陳瀅在將軍澳現身，否認跟家樂拍拖：「我哋兩個只係普通食飯，當日因為一齊拍完劇收工。」對於被指車陳家樂返香閨，陳瀅解釋說：「因為我屋企樓下就係港鐵站，家樂冇揸車我就車埋佢，我返咗屋企後再出咗去。」被問到覺得家樂為人如何？陳瀅衝口而出：「陳家樂抵讚！」細數他很專業、很勤力。至於家樂是否她杯茶？陳瀅笑說：「我冇諗呢樣嘢，雖然有工作人員話我哋似兩兄妹。」記者笑言她以契哥契妹來掩飾拍拖很老土，陳瀅即刻扭轉身尷尬地笑。不過之後她仍然強調，不會因而與家樂有所避忌：「其實食飯好正常，冇必要避忌，咁人人都要食飯㗎啦。」
順路搭港鐵
陳家樂昨日則出席電影《死因無可疑》開鏡禮。陳家樂先表示沒有餵陳瀅：「係角度問題，應該係讀者揸機角度問題，其實係冇嘅，大家覺得似啫。」至於與陳瀅同車返香閨，陳家樂與陳瀅口徑一致：「唔係去佢屋企，佢屋企好近港鐵站，嗰日我冇揸車，佢就車埋我過海，我去港鐵站。」問到是否跟陳瀅拍拖？他再否認：「梗係唔係我唔諗呢啲。」不過陳家樂亦大讚對方有義氣，似乎兩人大有發展空間。
採訪、攝影：畢紹基、吳耀輝、曹家誠、張俊銘
|
鍾意就快D Share啦！
|
|
|