今日沙田馬場，剛榮升馬主嘅堪輿學家李丞責同港姐老婆劉倩婷，名下新貴「歡樂從心」呢日正式登場，呢匹四歲澳洲馬，喺當地跑咗十戰得3勝4位成績甚佳，來港後試閘仲贏對手四馬位，速度快到冇朋友，所以初上陣臨場落飛成為5.1倍次熱門，賽前李丞責對愛駒機會仲非常樂觀，話今日著藍色(此馬綵衣顏色)有利，自己都係著藍衫到場。不過真係人算不如天算喇，「歡樂從心」冇錯速度好快、出閘後一支箭搶欄帶頭，但走咗半程突然慢車，仲愈褪愈後最終遙遙包尾，睇真啲，原來係流鼻血呀陰功！李丞責夫婦一做馬主就失利，確係唔多老利，但希望「歡樂從心」健康問題唔會太大，快啲好番，日後再上陣贏到頭馬喇！
呢日馬場不幸事一不離二，去到第七場，華將楊明綸策騎「霸氣」又告危險落樓！呢位騎者今日起步不久在馬林窄位競跑，馬兒突然失蹄，未幾便拋下楊明綸，當時前前後後都係馬，被馬蹄踢中就很危險了，可幸騎者吉人天相，本身清醒並可以自行上救護車，不過要送去威爾斯親王醫院做一個初步檢查。上周日返來客串一日嘅澳洲騎師安國倫，因策騎「美麗寶寶」落樓嚴重受傷，目前雖然進行了大手術，但四肢暫時仍未能郁動。
來源 source: http://hk.on.cc
|
鍾意就快D Share啦！
|
|
|
