「無數 曾經 陪伴我的人
雖已 離開 回憶仍活在我心
留我熱吻 是精彩戲份 重溫永遠都動人」
－－鄭伊健《吻感》
唱過多首蕩氣迴腸情歌的鄭伊健，他的歌曲陪伴大家走過愛情歲月，他的愛情世界很精彩，生命中出現過的女主角有黎芷珊、邵美琪、梁詠琪，經歷過轟動一時的「奪麵雙琪」，最後情歸蒙嘉慧譜出「蒙麵戀」；將於明年2月假紅館開騷的伊健，在facebook轉貼經理人公司帖文，叫網民揀一首他的歌曲，代表走過的愛情歲月，而主角伊健又如何選擇呢？
日前伊健在香港仔接受《蘋果》專訪說：「我哋嘅愛情好複雜，我覺得揀《吻感》，因為我係一個藝人，真真假假，假假真真太複雜，每個時段都有一個回憶，我覺得呢隻歌好啱藝人。」曾經出現的轟烈都過去，蒙嘉慧才是伊健甘為她去蹈火海的人，事隔6年伊健再開騷，蒙嘉慧靜悄悄拍短片為老公打氣，伊健的笑容從心而發：「開心，其實佢拍唔拍我都開心，感情好穩定先可以做好工作，我哋鍾意嘅嘢好接近，平時係一齊玩大家鍾意嘅嗜好，但到認真工作時就會靜止，畀我可以專心工作，咁樣已經係最好，因為唔需要煩惱任何嘢，可以集中去做好一件事。」
「蒙麵戀」拍拖7年，結婚5年，前年蒙嘉慧接受有線訪問，爆伊健曾經有幾年生日，都寧願留在家中度過，唔敢出街，有年蒙嘉慧不甘心，拉伊健由後門離家慶祝。提起這件事，伊健輕描淡寫地笑說：「有幾年，一生日，我哋鍾意玩挑戰，屋企有後門，我哋走時見到傳媒喺前面等，好有趣，呢件事只係我同佢先知，我哋上咗巴士，返到屋企佢哋都唔知，幾浪漫。」
然而，蒙嘉慧在節目中坦言伊健是受「奪麵雙琪」影響，被陰霾籠罩下才會生日都不敢外出！現在梁詠琪和鄭伊健都各自找到幸福，他坦然地面對舊事：「都冇嘅，過咗一段時間，都要面對，呢個係你嘅選擇，亦都係人生嚟，當然啦，你問當日嘅情況，嘩，我都唔識處理，覺得多一事不如少一事，盡量啲嘢唔發生就最好，我覺得呢個都係私人生活嚟，但以前都係一個話題，咁都過咗，o依家比較成熟、穩定，我會面對番以前嘅嘢，發生過就係發生過，有啲嘢過咗，你先搵到自己，同埋要面對。」
如果要揀首歌代表人生，伊健會揀《我的歌》：「因為好難得自己有機會做歌手，點解有人聽你唱歌，有好多機緣，呢首歌又係羅記（羅文）喺演唱會唱過，咁啱好似我哋嘅人生，我揀咗做一個歌手，所以我應該唱番呢首歌。」
伊健謹記師傅羅文的格言，認真對待自己鍾意的工作，在娛樂圈打滾30年，今時今日的他名成利就，亦用自己的力量幫助後輩，例如撮合「蒙麵戀」羽毛球情緣的黎諾懿，早前黎諾懿在電台節目自爆曾經窮到住劏房：「喺我最霉嘅時候，伊健會叫我去佢屋企揀衫。」提起此事伊健說：「我覺得佢係得嘅，有啲嘢唔好嘥錢啦，衫係要嚟着，既然佢唔介意，我希望佢着好啲。我哋拍《隨時候命》認識，佢又孝順，雖然呢個圈幾複雜，但可以選擇簡單溝通方法。」
黎諾懿感激伊健仗義相助，問到伊健要感激那些幫過自己的人？他說：「好多，自己一開始就喺電視台，當日肯畀機會簽我嘅人好緊要，就係馮美基，電影係劉偉強，另外仲有戰友林珊珊、陳光榮、羅記、朱祖兒，仲有屋企人，我喺屋邨長大，一個哥一個妹，有啲人一定要發達，但我屋企冇，總之你健全就得，搵到餐晏仔，唔使有任何壓力，就算我入行可能係反對，屋企話唔好做呢啲，搵份工實在啲好冇？我話都實在㗎，到做到有啲成績，屋企從來冇任何要求，到O依家都係咁簡單，大家食餐飯就得。」
場地：南海小館@海洋公園萬豪酒店
Hair : John Chung @ Barbieri Privata
Make up : WiLL Wong
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|