謝霆鋒一向出咗名Chok，不過，佢對住比佢更Chok更有型嘅老竇謝賢時，霆鋒完全毫無還擊之力，舉手投降。
話說霆鋒請咗汪明荃上自己個節目《鋒味》，霆鋒係宣傳片度話聽汪阿姐講，當年佢拍《千王之王》嗰陣，就係自己出世嘅時間，於是霆鋒就問四哥當時嘅情況係點，四哥就指當時同阿姐拍緊戲，點知收到電話話霆鋒要出世，四哥話自己一聽完就話：「好！」跟住佢就邊形容邊用手推咗汪阿姐一下，然後話自己除低件衫就即刻飛去醫院。
四哥話自己等咗15分鐘之後，就見到BB（即係霆鋒），點知佢一望就話：「那麼醜！」霆鋒聽完即打咗個突，跟住忍唔住反駁話：「像你！」雖然係咁，之後四哥又好感性話：「但是那天我一抱着他，我眼淚都出來了。」
之後另一嘉賓爆霆鋒話四哥覺得佢唔夠有型，一向型開嘅四哥就好得戚咁講：「沒有，他，慢慢來。」霆鋒就話四哥對着衫方面好計算，話自己出道嗰陣，四哥同佢講，着橫間衫就唔可以着直間褲，如果着直間嘅，對襪就唔可以有圈圈形狀，當霆鋒話聽四哥講呢啲邏輯聽到頭都大時，阿姐就話：「講究，那你肯定要聽他的，他穿衣服很講究。」
鏡頭一轉，見到有婆婆讚四哥同霆鋒都好紅，點知四哥一聽完就表示霆鋒只屬於一般，搞到阿姐笑住話：「一代勝一代。」四哥聽完又唔認輸話：「聽不懂這句。」之後，霆鋒又話有問題要問四哥，就係佢一直都戴住副超，到底睇唔睇到嘢？四哥就即時將副超除底，而霆鋒就攞住佢副超放喺鏡頭前，叫大家睇四哥視角，之後霆鋒還番副超畀四哥後，又話：「今天的不算黑，那麼黑能不能（看到）？」點知講完之後，四哥就爆咗一句：「我不想看到你！」而講完呢句之後，霆鋒都忍唔住話服。
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|