李克勤因為曼聯有個「送禮勤」花名，因為不滿寄失行李被稱為「barcode勤」，今次指責對手踢波唔友誼，唔知網民又會幫佢起個咩朵呢？
李克勤鍾意踢波，更獨愛英超球隊曼聯，2005年趁愛隊訪港期間送上禮物，但禮物慘被留低，從此多咗個花名「送禮勤」。
2015年年尾，李克勤出Post表示不滿航空公司寄失佢個行李喼，但網民一睇佢個喼張相，10個有9個都指其實係李克勤唔啱，話佢貼到成個喼都係barcode，電腦scan錯再送錯唔出奇，連Do姐都當眾話佢：「你咁鬼多barcode，人哋點scan呀？我又唔幫你喇真係！」有片流傳，再睇返都覺得好笑，網民更贈多個「barcode勤」稱號俾佢。
之後幾年，李克勤無再衝出嚟x，直到近日，佢IG表示喺馬來西亞踢友誼波時被人踢到甩晒皮，於是投訴場波一啲都唔友誼，兼特別點名對手14號仔。唔單只咁，克勤更專登走去14號仔面前影人正面相，唔打格擺埋上網。雖然有網民心痛克勤受傷，但亦都有人指責佢唔打格就擺人上網做法唔恰當，甚至批評佢一個大明星，踢波有碰撞咁小事就公審人，更加「唔友誼」。據克勤上載嘅相，相信除咗14號仔，佢應該都有同對方16號有過衝突，當時氣氛應該真係有啲火藥味。不過落場有勝負心有火好明白，但踢完揸揸手咪算囉，係要好似巴士阿叔「未解決」先過癮？
來源 source: http://nextplus.nextmedia.com
|
鍾意就快D Share啦！
|
|
|
