67歲老戲骨吳孟達（達哥）曾經係周星馳電影中嘅「最佳綠葉」，兩人默契極佳嘅喜劇表演堪稱香港經典，嗰陣佢哋拍完《他來自江湖》之後，佢哋仲上埋契，星仔做契爺，吳孟達係契仔，大家一直合作無間。不過自從2001年拍完《少林足球》後，兩人就冇再合作過，更一度傳出雙方有心結。近日，吳孟達大陸傳媒接受訪問時坦言，現時兩人有一種「老死不相往來」嘅感覺，令佢心中難免有啲遺憾。
吳孟達近日接受騰訊視頻訪問時，被問到同昔日拍檔周星馳嘅友情，達哥坦言有時都會諗點解會變淡，感嘆地話：「現在感覺有一點…老死不相往來那種感覺。」吳孟達透露其實幾年前同周星馳都仲有聯絡，當初星爺拍《美人魚》時亦有搵過佢，不過當時佢因為心臟健康問題，只好婉拒。
如今兩人情誼不再，吳孟達認為係因為彼此身邊環境改變，聯繫亦變少，各自都唔識開口繼續聯絡，達哥直言依家周星馳身份唔同，佢已經係大老闆，過得開唔開心佢唔知，但兩人嘅思想未必可以好似過去一樣有默契：「不管怎麼樣，相識一場，緣份都不容易。」
而曾經同周星馳係好拍檔嘅仲有導演李力持，今日《蘋果》問到李導演有冇同達哥一樣嘅感覺，佢話：「跟星仔熟，但跟周導演不認識，沒有聯絡。」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|